Team di Scol Basico Dornasol ricibiendo curso specialisa den autismo guia pa Hogeschool Windesheim y IPA
ORANJESTAD – E team di Scol Basico Dornasol a inicia un curso specialisa enfoca riba amplia conocemento y capacidad profesional pa guia muchanan cu diferente necesidadnan den nan desaroyo.
Ta brinda e trayecto di formacion, cu lo dura un aña, den cooperacion cu Hogeschool Windesheim y Instituto Pedagogico Arubano (IPA). Na final di e curso, e maestronan participante lo haya un specialisacion como coach di comportacion of coach di autismo, mientras cu e asistentenan lo adkiri conocemento specifico pa guia y sostene muchanan cu autismo den ambiente escolar.
Pa Minister di Educacion, Sra. mr. Gerlien Croes, profesionalisacion continuo di personal docente ta un inversion directo den calidad di educacion y, particularmente, den bienestar y desaroyo di cada mucha.
“Cada mucha merece e guia y atencion cu ta cuadra cu su necesidad. Pa logra esaki, nos mester tambe duna nos maestronan y asistentenan e conocemento y hermentnan necesario. Ora nos inverti den nan profesionalisacion, nos ta inverti directamente den futuro di nos muchanan,” Minister Gerlien Croes a expresa.
Un aspecto importante di e iniciativa ta su caracter duradero. Despues cu e prome scol aki completa e trayecto, IPA lo continua cu e curso, creando oportunidad pa mas maestro y asistente na Aruba por sigui e formacion specialisa aki. Segun Minister Gerlien Croes, esaki ta contribui na crea capacidad local y fortalece eeducacion riba termino largo.
“Nos no kier pa profesionalisacion no ta un esfuerso di un solo biaha, sino un proceso continuo den nos sistema educativo. Cu IPA continuando cu e curso, nos ta crea un base pa mas profesional den educacion por specialisa y, consecuentemente, pa mas mucha por beneficia di guia adecua”.
Minister Gerlien Croes ta desea e team di Scol Basico Dornasol hopi exito durante e aña di formacion y ta gradici e instructornan y profesionalnan di Hogeschool Windesheim y IPA pa nan aporte y compromiso.