Taxi.aw: E plataforma oficial di Gobierno pa tarifanan di taxi.
ORANJESTAD – Gobierno di Aruba a lansa e website https://taxi.aw, unda por subi pa haya e tarifanan vigente di taxi. E tarifanan a drenta na vigor diaranson dia 20 di mei 2026.
Cu e plataforma digital nobo aki, tarifa di taxi na alcance di tur pasahero y por calcula esaki di antemano den un forma facil y cla.
E “Taxi Fare Calculator” ta tene cuenta cu diferente componente cu tin influencia riba e tarifa final, manera cantidad di pasahero, maleta, uzo di bahul, dianan di fiesta y tambe gasto adicional pa orarionan laat entre 11:00 p.m. y 7:00 a.m. Adicionalmente, usuarionan por mira tur e componentenan cu hunto ta forma e prijs final.
Uzo y meta di Taxi.aw:
Facilmente, gobierno por actualisa e tarifa, amplia e sitio di salida y sitio di destinacion den e calculado, asina ey e usuario ta djis skirbi su destinacion y haya sa cuanto e mester paga pa e servicio di taxi.
E usuario por haya informacion importante tocante condicionnan y reglanan pa servicio di taxi. Via e website, e usuario por download diferente documento oficial.
Tin posters, flyers y QR codes cu por imprimi pa coloca den taxi, aeropuerto, hotel lobbies, restaurant lobbies, otro sitionan turistico y ta bay tin mas.
Ademas di tur esaki, via Taxi.aw por entrega cualquier keho relaciona cu e servicio of “ taxi fare”.
Meta principal di Taxi.aw ta pa haci tarifanan y reglanan di servicio di taxi mas cla, moderno y accesibel pa taxistanan, pasaheronan y henter sector turistico.
