Ta pronostica cu no lo tin inflacion na Aruba pa 2025, pero deflatie: –0.1%
ORANJESTAD – Ta premira cu Aruba lo conoce un deflacion (deflatie) leve na 2025, segun Ministerio di Finansa, Asuntonan Economico y Sector Primario.
Cifranan nobo di Departamento di Asunto Economico, Comercio y Industria (DAECI) ta proyecta inflacion na –0.1%, marcando un cambio fuerte for di e pronosticonan anterior.
E indice di prijs di consumo (CPI), publica mensualmente pa e Oficina Central di Estadistica (CBS) ta midi e cambio promedio den prijs riba mercado di un canasta di productonan y servicionan cu consumidornan ta paga. Mientras ku CBS ta informa desaroyonan di prijs actual y no ta haci proyeccion pa loke ta spera di inflacion, DAECI ta incluí proyeccion di inflacion den su Economic Outlook dos biaha pa aña.
DAECI inicialmente a proyecta un inflacion di 1.7% pa 2025 na fin di 2024, despues a ahusta e calculacion ey na 1.9% na mei 2025. Pero den su ultimo analisis, e departamento awor ta anticipa cu prijsnan lo baha un poco otro aña, impulsa pa tanto desaroyonan internacional como local.
E cifranan di october di CBS ta mustra un inflacion di 0.2% di aña tras aña, siguiendo un tendencia cu ta sigui baha for di e maximo di inflacion di 2022 di Aruba di 5.5%. E bahada den prijs di bari di petroleo y su impacto positivo riba prijs di gasoline y diesel y desaroyo local manera bahada di accijnzen riba gasoline y diesel desde 1 di mei 2025, a yuda pusha e tasa di inflacion proyecta den teritorio negativo. DAECI ta premira un inflacion di -0.1 porciento of “deflatie.”
Segun Minister di Finansa, Asuntonan Economico y Sector Primario Geoffrey Wever, nivelnan di prijs ta afecta directamente e poder di compra di tur hende. P’esey banda di proyecta inflacion ta monitor tur luna kico CBS ta publica cu tawata e inflacion. Como isla nos ta importa tambe inflacion y a baha accijnzen riba gasoline y diesel como instrumento di e maneho economico di gobierno pa mitiga e impacto di prijsnan internacional riba nos nivel di prijs.
Minister di Finansa, Asunto Economico y Sector Primario, Geoffrey Wever, ta gradici CBS pa e trabao di tur luna di publico e desaroyo di nivel di prijsnan na Aruba y ta invita un y tur pa bishita e website di CBS www.cbs.aw pa tur informacion detaya y oficial.
