Ta prepara Brandweer pa por atende cu cualkier calamidad di aviacion

Tanto Minister di Husticia, , Integracion y Transporte Publico mr. drs. Arthur Dowers, como comandante di Brandweer Aruba, Johannes de Haas, tabata presente pa desea e bomberonan aki tur clase di exito cu e siman intensivo di training.

Comandante de Haas, a indica cu e facilidad di training na Jacksonville, ta ofrece training specialisa na nos bomberonan pa mantene nan optimalmente prepara den nan tarea di combati candela. E training aki ta specialmente pa mantene e bomberonan ubica na Post Oscar na Aeropuerto skerpi y riba nivel internacional pa por atende cu cualkier calamidad di aviacion. 

Segun comandante de Haas, e cumplimento cu e training aki ta crucial pa por cumpli cu e audit cu ta haci cada 3 aña riba e preparacion di e bomberonan na aeropuerto. Esnan cu no completa e training aki cu exito, no ta permiti traha warda na Post Oscar y si no tin suficiente personal riba standby na aerouperto, Post Oscar no por funciona. Pesey ta importante pa tin suficiente bombero certifica cu e training aki. Recientemente 14 bombero a sigui e training aki, awo ta 14 mas y den futuro cercano ainda tres grupo di 14 bombero lo biaha pa Jacksonville y otro aña lo cuminsa atrobe cu e training aki. 

E curso ta encera paga candela di motor di avion, candela durante aterisahe, pero tambe con pa rescata pasaheronan for di avion despues di un accidente. E curso ta repasa tur aspecto di rescate den caso di un accidente cu avion, di candela, y tur posibel scenario cu ta inclui avionnan accidenta. Ademas, e cumplimento di e trainingnan aki ta parti di e checklist di Organisacion Internacion di Aviacion Civil (International Civil Aviation Organization - ICAO) su certificacion.