Ta invita empresarionan creativo registra pa e Qreative Business Academy
ORANJESTAD - Durante un conferencia di prensa, diahuebs 17 di october 2024, minister di Asunto Economico, Comunicacion y Desaroyo Sostenibel, Geoffrey Wever a anuncia cu hunto cu Qredits Aruba lo bay ofrece e Qreative Business Academy pa duna e comerciante creativo e guia con pa habri y expande un negoshi.
Qreative Business Academy ta un otro colaboracion entre Qredits Aruba y Gobierno di Aruba, pa provee workshops dedica specificamente na e necesidadnan di un empresario creativo.
E industria creativo tin un rol importante den desaroyo economico di Aruba, y diversificacion di e producto Aruba. Vision y maneho economico di ministerio di Asuntonan Economico tin como prioridad pa sostene e Orange Economy - e industria creativo cu ta encera tur arte, artesania, musica, baile, entre otro aspectonan creativo, como negoshi.
E Creative Business Academy tin un trayecto di 10 siman, bou guia di un docente cu lo yudabo desaroyo bo plan di negoshi y bo plan financiero durante diferente sesion. Por registra via e link aki. Kick off mes di e tayernan lo ta 19 di november proximo.
E biaha aki Cadushi Festival tambe lo forma parti di e colaboracion aki unda cu e participantenan na e Qreative Business Academy ta haya oportunidad pa 'show case' nan productonan durante e festival.