Supervision di ‘Ley di Prijs’
ORANJESTAD - Entrante 15 di augustus 2026, Ministerio di Finansa, Asunto Economico y Sector Primario ta introduci e supervision riba ‘Ley di Prijs’ (Bestuurlijke Handhaving Prijzenverordening)
E meta di e supervision di e ‘Ley di Prijs’ ta pa tur comerciante respeta e prijs di productonan basico di prome necesidad (Canasta Basico), cualnan ta stipula pa gobierno. Departamento di Asunto Economico, Comercio y Industria (DAECI) ta eherce e supervision di e ‘Ley di Prijs’, specificamente riba maneho y cumplimento di prijsnan di e productonan di canasta basico, y riba indicacion di prijs riba tur producto na supermercadonan.
Conforme e cambio den e 'Ley di Prijs', entrante 15 di augustus 2026 gobierno ta impone boet na tur supermercado y distribuidor mayoritario cu no ta cumpli cu e prijs maximo stipula pa productonan di e Canasta Basico.
Controladornan di DAECI ta eherce control rutinario of segun keho na tur supermercado. Durante control nan ta verifica si e prijs no ta mas halto cu e prijsnan maximo stipula pa gobierno y si tur producto tin indicacion di prijs. Den caso di un infraccion riba e ley lo actua conforme e procedura stipula cual por ta un Last Onder Dwangsom of un boet.