Stichting Ambiente Nobo cu Pasadia nobo pa adulto mayor
ORANJESTAD - Diahuebs 5 di september 2024, Ministerio di Transporte, Integridad, Naturalesa y Asunto di Adulto Mayor a anuncia cu Gobierno a aloca fondo necesario pa inicia un otro Pasadia, e biaha aki na Stichting Ambiente Nobo.
Na 2004, zuster Filotea a funda Stichting Ambiente Nobo y pa e ultimo 20 añanan a brinda servicio na un grupo vulnerabel den nos comunidad. E meta ta pa duna un bida digno na nos adultonan mayor cu limitacion intelectual y cu e sosten financiero aki, por garantisa e continuidad di e servicio valioso cu Stichting Ambiente Nobo ta duna na adultonan mayor cu ta bishita nan tur dia. Actualmente, e fundacion ta atende 35 persona y tin un lista di espera di 14 persona, pues e fondo adicional ta indispensabel pa asina por yuda mas hende cu e cuido necesario.
Stichting Ambiente Nobo, ta hunga un rol fundamental den e bida di su clientenan, ta fortalece y ofrece nan un sentido di pertenencia. E fondo adicional lo trece un alivio pa gerencia y e famianan cu ta depende di e cuido di Stichting Ambiente Nobo.