Siman Mundial di Conscientisacion tocante Resistencia Antimicrobiano
ORANJESTAD – Di 18 - 24 november ta celebra Siman Mundial di Conscientisacion tocante Resistencia Antimicrobiano( RAM).
Kico ta Resistencia Antimicrobiano (AMR)
Resistencia antimicrobiano ta sosode ora cu micro-organismo manera bacteria, virus, fungus y parasito cambia cu tempo y no ta reacciona mas riba e medicamentonan cu normalmente ta combati nan. Debi na e resistencia aki, antibiotica y otro remedinan antimicrobiano ta perde nan efectividad. Esaki ta haci cu infeccionnan comun ta bira hopi mas dificil of hasta imposibel pa cura, aumentando e peliger di malesanan grave y e plamamento di infeccion den nos comunidad.
Siman Mundial di Conscientisacion
E campaña mundial aki ta tuma luga tur aña pa aumenta conocemento y crea comprension tocante e uzo responsabel di medicamento y antibiotica. E meta principal ta pa frena e aparicion y plamamento di infeccionnan cu ta resistente na remedi, protehando asina salud di hende, bestia y medio ambiente.
Tema 2026: "Educa. Boga. Actua awo."
E tema di e aña aki ta haci un yamada urgente na cada ciudadano, profesional di salud y lider den comunidad pa tuma accionnan concreto:
- Educa: Compronde con antibiotico ta traha y siña e diferencia entre un infeccion bacterial y un viral (manera un griep of verkoud comun, caminda antibiotica no ta yuda). Comparti informacion corecto cu bo famia y amistadnan.
- Boga: Papia abiertamente y promove e uzo responsabel di remedi den bo entorno. Sostene esfuersonan den cuido medico y den comunidad pa implementa miho higiena y control di infeccion.
- Actua awo: No warda te ora ta laat. E cambio den nos custumbernan diario ta e unico manera pa salvaguardia e efectividad di nos medicamentonan pa futuro generacionnan.
Con abo por yuda preveni Resistencia?
E uzo innecesario of incorecto di antibiotica ta e motibo principal pakico bacteria ta bira resistente. Abo por haci e diferencia door di sigui e pasonan aki:
- Uza antibiotica solamente ora ta echt necesario: Tuma antibiotica unicamente ora un dokter prescribi esaki pa bo.
- Sigui e instruccionnan di dokter cabalmente: Caba bo tratamento completo manera indica, hasta si bo ta sinti bo miho prome cu e pildonan caba.
- Nunca comparti of automedica: No uza antibiotica cu a resta di un malesa anterior y nunca bebe remedi cu a wordo receta pa otro persona.
- Prevencion ta e miho remedi: Laba man regularmente, mantene bo vacunanan 'al dia' y prepara cuminda na un manera higienico pa evita cu bo ta haya infeccion na prome luga.
- Sea consciente di cada remedi cu bo ta bebe y yuda proteha e poder di antibiotica pa ora nos realmente tin mester di nan pa salba bida.
