Sesion virtual pa studiantenan cu ta bayendo Merca pa nan estudio
ORANJESTAD - Minister Plenipotenciario na Merca hunto cu Education USA ta ofrece diabierna awor, 10 mei 2024 un sesion virtual pa studiantenan cu ta bayendo Merca pa nan estudio.
ORANJESTAD - Minister Plenipotenciario na Merca hunto cu Education USA ta ofrece diabierna awor, 10 mei 2024 un sesion virtual pa studiantenan cu ta bayendo Merca pa nan estudio.
Durante e sesion aki studiante- y graduadonan Arubiano na Merca lo hiba palabra y lo comparti nan experiencia cu hobennan cu ta desea di haya mas informacion. Sea bo ta den examenklas y ta bayendo pa studia e aña escolar cu ta bin, of ainda bo mester dicidi si bo kier bay Merca, bo ta un mayor of bo ta un educador cu kier sa mas di Merca.
Un y tur ta cordialmente invita pa un sesion cortico di un ora riba diabierna 10 mei, un dia liber pa mayoria di studiantenan, di 11.00 am – 12.00 pm.
Pa por participa y ricibi e link virtual, mester registra sea via https://forms.gle/YvTPa4QhbaMXeFbFA of door di manda un mail pa aruba@educationusa.org.
Education USA na Aruba ta un iniciativa di US Department of State por medio di Consulado General Mericano na Corsou pa brinda informacion preciso, completo y actual riba oportunidadnan di estudio na scolnan acredita na Merca. Recientemente Minister di Enseñansa, Sr. Endy Croes, a apunta un profesional local, Sra. Edseline Gomez como Senior Advisor na Education USA. Na mesun momento a cuminsa un colaboracion estrecho entre Sra. Edseline Gomez di Education USA y Sra. Zulema Dabian-Erasmus, Minister Plenipotenciario na Merca cu a resulta den e prome actividad virtual aki.