Seleccion Girls U15 campeon e torneo Concacaf
ORANJESTAD - Diasabra 24 di augustus 2024, Prome Minister Evelyn Wever-Croes, hunto cu Minister di Deporte Endy Croes, a duna reconocemento na e futbolistanan di e seleccion Girls U15 cu a logra e titulo maximo di e torneo di Concacaf teni na Aruba.
Presente dilanti Bestuurskantoor tabata e mayornan, famia- y amigonan, como tambe e presidente di Arubaanse Voetbal Bond (AVB) Randolf Lacle y otro representante di AVB.
Di parti di Gobierno di Aruba, e futbolistanan femenino a ricibi un medaya, mientras cu di AVB tambe nan a ricibi un bunita regalo. Tabata un mainta di orguyo y alegria, no solamente pa e mucha muhenan ganado, sino pa Aruba completo cu a biba cada momento cu nan durante e weganan. E esfuerso y dedicacion di tanto e futbolistanan, coach y staf tecnico a duna su fruto y e titulo maximo ta motibo pa ta orguyoso.
Danki na esfuersonan y inversion cuantioso haci den stadion Guillermo Prospero Trinidad cu FIFA a permiti e weganan aki tuma luga na Aruba mes y comunidad completo por a disfruta e campeonato aki y biba e triunfo di e hobennan campeon na cas.