SEDECO tambe ta haci e cambio pa auto electrico
ORANJESTAD - Aña pasa Ministerio di Asunto Economico a inicia un estudio di mercado hunto cu DOW unda a haci un inventario detaya di e flota di auto di Gobierno y di e opcionnan disponibel na Aruba.
Na september 2024 e enfoke a cuminsa riba e autonan di lease den uzo na Departamento di Asunto Economico, Comercio y Industria (DAECI).
Estudionan inicial cu compara diferente elemento, manera e.o. prijs, servicio, combustibel, a demostra cu transiciona pa autonan electrico ta logra un 14% reduccion di costo compara cu auto convencional. E intencion ta pa transiciona e autonan den aparato gubernamental pa EV's electrico unabes nan lease termina. Como continuidad di e vision di Ministerio di Finansa, Asunto Economico y Sector Primario pa reduci gasto y facilita e transicion energetico, awor ta toca turno na Servicio na defensa di consumidor (SEDECO) pa haci e cambio pa auto electrico. N.V. ELMAR lo zorg pa e infrastructura pa por carga e vehiculo electrico na ex-edificio di Interbank, caminda SEDECO ta ubica.
Esaki ta parti di e plan y vision cu Ministerio di Finansa, Asunto Economico y Sector Primario, cu sosten di e programa Green Overseas (GO) cu Union Europeo (EU) ta financia. Na 2024 a encarga e compania Expertise du France (EF) pa eherce un estudio pa sostene e proyecto aki di transicion energetico, cu tin como meta pa crea un 'blueprint' pa e otro paisnan y teritorionan di EU pafo di Europa tambe por acelera e transicion pa mobilidad electrico. Pa e trayecto aki, Union Europeo a aloca €190.000 pa Aruba. Cu e colaboracion aki a demostra di con por haci uzo di fondo di Europa cu ta destina pa contribui den teritorionan pafo di Europa.
“Poco poco pero sigur nos ta sigi implementa e vision y trayecto cu nos a cuminsa na 2024”, Minister di Finansa, Asunto Economico y Sector Primario a bisa, “Nos tin como meta ta pa sigui baha gasto den nos aparato gubermental y alabes lidera e transicion. Gobierno di Aruba ta tuma e rol ehemplar aki pa otro pais cu ta encontra e mesun retonan, pero tambe den propio cas.”
Despues cu Minister Wever a haci entrega di e prome 4 auto electrico na DAECI como parti di e programa piloto pa e transicion pa autonan electrico den Gobierno na september, 2024, awor ta toca turno na SEDECO. Despues lo continua na departamento di CBS cu tambe lo bay cambia pa auto electrico. Cu reduccion di gasto operacional y di emision di CO2 di auto na Aruba nos ta promove miho calidad di bida, proteha naturalesa y contribui na frena e cambio climatico.