Seccionnan den e area di Parkeer Publico di Aeropuerto di Aruba lo cera Temporalmente pa Mantencion di Panel Solar.
ORANJESTAD– Aruba Airport Authority N.V. (AAA) ta informa publico cu trabou di mantencion relaciona cu instalacion di panel solar riba seccionnan di e area di Parkeer Publico lo tuma luga for di 3 di november te 3 di december 2025.
Durante e periodo aki, e seccionnan di e area di Parkeer Publico lo cera temporalmente den fase pa facilita e actividadnan di mantencion.
Pa garantisa cu e molester pa biahero y bishitante lo ta menos posibel, e area di parkeer lo sigui habri y lo ta accesibel durante e periodo di mantencion, cu lo cera zonanan designa so den e area di Parkeer Publico.
Informacion Importante pa usuarionan di e area di Parkeer Publico
- Zona di Trabou: Lugarnan marca cu pilon oraño of otro ekiponan di demarcacion ta indica un zona activo di trabou. Por fabor no parkeer den e lugarnan aki.
- Siguridad di Vehiculo: Pa preveni daño of cualkier tipo di molester, ta recomenda cu usuarionan move nan vehiculonan for di e zonanan cu lo ta marca pa mantencion den e area di Parkeer Publico.
- Disclaimer di Parkeer: Tene na cuenta cu uzo di e area di parkeer publico ta na riesgo propio di e doño di e vehiculo.
Si bo sa di amigonan of famia cu tin vehiculo para na aeropuerto mientras nan ta afo, por fabor comparti e informacion aki pa nan ta na altura y por move nan vehiculo si por.