Sarampi, un menasa mundial

Sarampi ta un di e malesanan mas contagioso cu ta existi y ta causa pa e morbillivirus cu ta transmiti den aire na momento cu e persona infecta ta tosa of nister. E virus por ocasiona complicacion severo y hasta morto. Prome cu e introduccion di e vacuna contra Sarampi den aña 1963, tur aña un cantidad grandi di mucha, particularmente bao di 5 aña, tawata fayece debi na e malesa aki. Desde introduccion di e vacuna contra Sarampi, e casonan mundialmente a baha y na Aruba desde su introduccion na aña 1979 no a detecta e malesa aki mas. Esaki ta danki na e grado di vacunacion halto (95%) bao di nos muchanan entre edad di 0 cu 10 aña. 

Recientemente, World Health Organisation (WHO) a bati alarma atrobe pa aumento den casonan di Sarampi tumando luga den diferente pais di Europa (40 pais) y Merca (18 estado) bao mucha como adulto. Recientemente den Caribe a confirma dos caso di Sarampi. Organisacionnan di salud ta di opinion cu e brote di Sarampi ta tumando luga debi na e reduccion den grado di vacunacion particularmente despues di e pandemia di COVID. Hopi mayor a dicidi cu nan no ta vacuna nan yiu contra Sarampi, y esey ta causa cu e inmunidad di e pais ta baha, aumentando e riesgo pa e virus plama mas entre e comunidad no vacuna y esnan mas vulnerabel.

Departamento di Saludo Publico (DVG) mientrastanto a cuminsa reuni cu diferente partners pa cuminsa traha riba un plan pa mitiga of reduci e posibilidad cu Aruba lo por haya un caso importa di Sarampi. Mescos cu e virus di COVID, ta imposibel preveni e virus di Sarampi drenta nos pais, pero ta importante si pa Aruba ta bon prepara pa maneha su transmision ora esaki drenta y alabes ofrece proteccion na e grupo di ciudadanonan mas na riesgo, di bira hopi malo of hasta fayece si nan bin den contacto cu e virus. 

Den e siguiente dianan DVG lo bay ta informando comunidad mas riba e desaroyonan rond di e virus di Sarampi y e pasonan cu ta tumando.

Pa mas informacion like DVG su Facebook page Directie Volksgezondheid DVG Aruba, Follow DVG riba Instagram directie_volksgezondheid_aruba, subi www.dvg.aw, yama 5224200 of manda bo email na servicio@dvg.aw.