Sarampi ta aumentando rond mundo

Esaki debi na e reduccion drastico den cantidad di mucha vacuna contra sarampi globalmente.

Resistencia contra vacuna durante di e pandemia di COVID-19 a pone cu hopi mayor rond mundo a opta pa no vacuna nan yiunan cu e vacuna regular di MMR1 y MMR2 cu ta proteha contra Sarampi, Mumps y Rubella. E porcentahe relativamente halto cu no ta vacuna contra Sarampi, awo ta habri e caminda pa e virus plama rond mundo y na 2022 a mira un aumento caba di 18% compara cu 2021, 64% na 2023 compara cu 2022 y 2024 e contagio ta acelerando y ta inevitabel cu pronto Sarampi ta haci su entrada na Aruba.

Sarampi ta un di e malesanan mas contagioso cu ta existi y ta causa pa e morbillivirus. E virus aki ta transmiti hopi facil via aire na momento cu e persona infecta ta tosa of nister. Atraves di nanishi, boca of wowo e virus ta drenta e curpa, ta afecta e sistema respiratorio y despues ta plama den ful e curpa ocasionando keintura, tos, nanishi ta core y rash riba ful e curpa. E malesa por afecta hende di tur edad y ocasiona complicacion severo y hasta morto.

Teniendo na cuenta cu Aruba ta ricibi hopi turista for di diferente continente y pais no por descarta cu Aruba por haya caso importa di Sarampi na cualkier momento. E continente Americano di unda Aruba ta haya hopi turista ta raportando 206 caso, Europa tin 695 caso confirma te cu maart 2024 y den region Caribe tin 2 caso confirma.

Departamento di Salud Pubico (DVG) ta sigui monitor e desaroyo mundial aki di cerca y ta continua cu reunionan cu diferente partners pa traha riba un plan pa mitiga Sarampi na Aruba. Den e siguiente dianan DVG lo informa comunidad mas riba e desaroyo di Sarampi y e pasonan cu Aruba ta tuma pa prepara pa cu esaki.

Pa mas informacion like nos Facebook page Directie Volksgezondheid DVG Aruba,
Follow nos riba Instagram directie_volksgezondheid_aruba, subi nos website
www.dvg.aw, yama nos na 5224200 of mail nos na servicio@dvg.aw.