Santa Rosa a finalisa su proyecto di Syntropic Agroforestry

A cuminsa cu e trabounan di prepara e tera y midi e tereno. Despues a continua cu cobamento di e canalnan y na final a pone e parti organico cu ta entre otro taki di mata seco, rama di mata y tambe stam di mata.

Despues a  dera nan pa asina laga e tereno cla pa cuminsa planta. E parti organico aki ta pa crea un tipo di gordura den e desaroyo di tereno, dun’e mas bida y fortalece cu mineral.

Scol di Polis den transcurso di ultimo añanan ta bishita Departamento di Agricultura, Cria y Pesca Santa Rosa. Esaki ta parti di nan estudio y tarea pa conoce mas di medio ambiente y tambe pone nan mes na altura di un of otro situacion cu nan por haya nan mes aden pa loke ta trata Sector Primario na momento di eherce nan funcion como agente policial.  E klas N42021 di Scol di Polis a haya un presentacion y guia den Santa Rosa algun luna atras y a invita e mesun klas aki pa duna un man y experiencia e proyecto aki.

For di mainta tur a bin hunto y topa e coleganan di Santa Rosa y asina  pone man na obra pa finalisa e proyecto.
A cuminsa cu cobamento y plantamento di diferente mata y a sigui cu plantamento di simiya y  otro tarea pa realisa e “hofi di alimentacion di Santa Rosa.  

Palabra di gratitud ta bay na sra. Rosalinde Barros-Poels di Living Soil kende ta encarga den guia e proyecto y duna aporte cu su conocimento. Na nos colega sr. Ludwig Rasmijn kende ta lider y coordinado di e proyecto.  Sigur tambe na tur colega di Santa Rosa cu a pone man na obra pa e proyecto. Un danki grandi na Cuerpo Policial Aruba (KPA), Scol di Polis klas N42021 cu hopi interes a participa y duna man den nos proyecto. Sra. Elisa van Loon di Korps Politie Aruba cu a duna tur cooperacion pa e klas por tabata presente.