Salud Publico ta monitor activamente pa detecta caso di Sarampi of Chikungunya tempran

Pa e motibo aki cu Salud Publico ta monitor activamente caso nan di Sarampi y Chikungunya cu ta creciendo den region. 

Segun ultimo dato nan disponibel, den region di America (PAHO), tin un total di 1031 caso di sarampi registra, di cual mayoria ta den Mexico y Merca. 

Pa loke ta trata Chikungunya, tin dos caso registra e aña aki na Aruba importa for di paisnan cu ta experenciando brote di Chikungunya. Segun ultimo dato nan disponibel di PAHO, den continente Americano tin un total di 2351 caso confirma di Chikungunya y 1 morto a causa di Chikungunya registra.

Pa Aruba por evita importacion di sarampi of transmision local di chikungunya ta importante y necesario pa no solamente organisacionnan di salud traha hunto pa señala y detecta casonan potencial trempan, pero ta importante pa comunidad tambe ta bon informa y sa kico pa haci ora nan tin cierto sintomanan of ta pensa di a keda exponi na un di e malesanan aki riba menciona.

Sarampi.

Ta un malesa altamente contagioso cu ta pasa di hende pa hende na momento cu un persona cu ta contagia cu e virus ta tosa, nister of supla nanishi. Na momento di tosa of nister, particulanan di e virus ta keda algun rato den aire y despues ta cay riba superficie unda un otro persona por piki esaki cu su man y atravez di boca, nanishi y wowo y asina ta haya e virus den su curpa. Despues cu e virus a drenta e curpa dentro di 7 cu 14 dia e persona ta cuminsa presenta sintoma di: 

• Keintura halto;;
• Nanishi ta core
• Tos seco;;
• Wowo cora of inflama
• Dolor di garganta;
• Cansancio fuerte;
• Manchanan color cora riba cuero (rash), cu ta cuminsa na cara y despues ta plama riba curpa.

Ta importante cu un persona ta presenta e sintomanan aki tuma contacto telefonico cu su dokter di cas, sigui tur instruccion di su dokter y evita contacto cu demas persona. 

Chikungunya.                                                                                             Chikungunya ta un malesa viral transmiti pa e mesun sangura cu ta transmiti Dengue (sangura pata blanco). E sintomanan mas comun ta:

• Keintura diripiente;
• Dolor fuerte di articulacion nan (pols, enkel, rudia, elleboog p.e.),;
• Dolor di cabes;
• Dolor di musculo;
• Cansancio;
• Rash riba cuero (tin biaha). 

Normalmente e sintomanan ta presenta entre 2 cu 12 dia despues di a keda pica pa un sangura infecta cu e virus. Ta importante cu un persona cu ta presenta e sintomanan aki (y den caso cu bo ta regresa di un pais cu tin brote di Chikungunya) tuma contacto telefonico cu su dokter di cas, sigui tur instruccion di su dokter y percura pa e no haya mas pica di sangura. Haci esaki door di elimina criadero nan potencial, bisti paña cu man y pia largo, uza repelente contra sangura y evita areanan scur unda sangura gusta sconde.

Pasobra Bo Salud ta nos Prioridad, DVG ta sigui mantene comunidad bon informa.

Pa mas informacion:

• Like Facebook page Directie Volksgezondheid DVG Aruba;
• Follow  riba Instagram directie_volksgezondheid_aruba;
• Follow nos den WhatsApp Channel;
• Subi www.dvg.aw;
• Yama 5224200;
• Mail na servicio@dvg.aw.