Reunion cu varios consul staciona na Aruba

Consul General di Republica Dominicana 

E prome reunion tawata cu Consul General di Republica Dominicana sr. Luis Perez Delgado. Sr. Delgado a indica e preocupacionnan cu mas tin bou di e ciudadanonan di Republica Dominicano na Aruba. A papia riba e rutanan di transporte pa por trece fruta y berdura, material di construccion mas frecuente y lihe pa asina por tin productonan mas fresco y na prijsnan mas abou.  

Consul General di Colombia 

Cu Consul General di Colombia, sr. Gustavo Serrano Amaya a trata diferente tema, entre otro e tema di permiso, y a discuti e posibilidadnan pa traha hunto cu Colombia, den caso di desaster y calamidad. Mientrastanto Colombia, riba su propio costo, a invita Aruba pa varios training relaciona cu esaki. Ademas a papia riba e posicion di hende muhe, entre otro e proteccion di hende muhe, cu na Colombia ya ta hopi avansa. Den pasado Aruba a extende un man na e embahador pa e dos paisnan traha hunto riba esaki y awo Colombia a invita Aruba pa mas cooperacion riba e tema. 
Cu Consul di Colombia ademas a elabora riba e relacion comercial entre ambos pais, y e posibilidad pa fortifica esaki mas. Esaki ta importante pa Aruba por yega na importa carni y galiña di calidad for di Colombia na prijs faborabel. Segun e consul, trabaonan ta andando pa logra esaki y e meta ta pa concretisa esaki prome cu fin di 2024. Di parti di Gobierno di Aruba tin algun ley pa cambia ainda pa por cuminsa importa carni y galiña for di Colombia. 

Consul Honorario di Jamaica 

E ultimo consul cu Prome Minister a reuni cu ne ta e Consul Honorario di Jamaica, sr. Don Taylor. Segun sr. Taylor, ya caba tin algun compania na Aruba cu tin cierto relacion comercial cu Jamaica, cual ta hopi importante y lo sigui busca pa mehora den esaki. Ta importante pa expande e relacion comercial cu Jamaica, ya cu esaki ta yuda cu e desaroyo di e economia di Aruba. 
Prome Minister a indica cu relacion exterior ta un tema cu realmente ta cay bou e competencia di Reino Hulandes y Aruba ta hopi mara na locual cu Hulanda ta indica den esaki. Na Aruba esaki ta resorta bao di su ministerio y p’esey ta hopi importante pa mantene e relacion cu e consulnan. Tin un Cuerpo Consular na Aruba caminda tur e consulnan ta representa den dj’e y tin reunionnan regularmente cu nan riba tur e temanan di importancia. 
Pa Gobierno ta importante pa tur ciudadano cu a hace di Aruba nan hogar, sinti nan mes na cas, atene nan mes naturalmente na e regla- y proceduranan di nos pais y pa yuda Aruba sigui bay padilanti.