Reunion cu e comision encarga cu regulacion di e vehiculonan UTV y ATV

Na 2022, Gobierno a insitui un comision pa pone un poco mas atencion na e tipo di vehiculonan aki, mirando cu no semper nan ta sigur y tabata envolvi den algun accidente basta grave den pasado.

Habitantenan cu ta biba mas den areanan na unda e vehiculonan aki ta pasa, ta keha regularmente di e desordo cu nan ta haci y e stof cu nan ta lanta. Tambe kehonan ta drenta cu ora e vehiculonan aki ta riba caminda, nan ta para y stroba trafico. Ademas e efecto cu e vehiculonan aki tin riba naturalesa tambe ta preocupante. 

E atraccion aki ta uno hopi gusta pa nos bishitantenan y pa e motibo aki, e comision encarga a bin ta traha ya caba un aña riba diferente posibilidad pa mantene na un manera sigur. Departamento di Transporte Publico a duna un presentacion con pa efectua un miho control riba e vehiculonan aki, Dienst Technische Inspectie (DTI) a mustra e partinan di peliger cu tin, y Departamento di Impuesto a bin cu un proposicion pa crea un categoria nobo, special pa por registra e tipo di vehiculonan aki. 

E meta primordial di Gobierno ta pa regula y bin cu rekisitonan cu tur compania cu ta ofrece e vehiculonan aki como atraccion, mester cumpli cu ne. E vehiculonan lo mester ta "gekeurd", nan mester ta sigura y cumpli cu exigencianan di siguridad pa asina por garantisa cu tur hende ta sigur. Ademas ta trahando riba rutanan alternativo pa evita cu e vehiculonan aki causa molester na habitantenan y destrui naturalesa. Aki e departamento di naturalesa y medio ambiente tin un rol sumamente importante pa asina bin cu e cambionan den ley necesario. 

Un otro tema treci dilanti ta e stepnan, segway, scooter y e-bikes. Algun di nan ya caba ta cay den categoria conoci pero otro no. Prome Minister a expresa cu un step of segway no ta vehiculonan cu mester ta riba caminda ni banda di caminda, pasobra no tin permiso pa esaki. Mirando cu ya tin companianan cu ta ofrece e medio di transporte aki, lo mester sinta cu nan pa delibera con pa yega na regula esakinan tambe.

Siguridad den trafico y pa e peaton ta primordial, y p’esey lo traha duro na yega na decisionan beneficioso pa tur envolvi.