Restauracion di toren di Willem III na Fort Zoutman ta avansa segun plan

E proyecto ta progresando satisfactoriamente y ta ehecuta e diferente fasenan segun e planificacion estableci.

Segun Sr. Gei, e equipo ta sigui monitoria cuidadosamente e trabounan pa garantisa cu e restauracion ta cumpli cu e criterio tecnico y historico cu un monumento di e importancia aki ta exigi. "E proceso ta cana bon y nos ta satisfecho cu e progreso. Tur cos ta sigui e trayecto corecto," el a splica.

Durante e restauracion, tambe a sali algun elemento adicional cu ta merece atencion. Un di nan ta e ringbak exterior di e toren, cu despues di inspeccion, a resulta ta den un estado di deterioro mas serio cu tabata anticipa. Monumentenbureau ta den proceso di solicita oferta pa e restauracion y reemplaso di e componente aki, y posteriormente integra den e proyecto.

Maske e elemento adicional aki por rekeri algun trabou extra, Gei a enfatisa cu e no ta afecta significativamente e planificacion general. E expectativa ta cu e restauracion principal di e toren por ta completa entre fin di october y fin di november, adelantando e proyeccion inicial cu tabata pa final di aña of principio di 2027.

E restauracion di Willem III Toren na Fort Zoutman ta forma parti di e vision mas amplio di Gobierno di Aruba pa preserva y fortalece e patrimonio historico di nos isla. E proyecto no solamente ta conserva un di e monumentonan mas emblematico di Aruba, sino tambe ta contribui na mantencion di nos identidad cultural y herencia nacional pa generacion futuro.

Gobierno a pone e preservacion di patrimonio historico y cultural como un di e prioridadnan. A impulsa diferente iniciativa pa proteha y duna valor na nos monumentonan nacional, incluyendo preservacion di edificio na San Nicolas manera Kapel Emanuel y Misa na Bernhardstraat, como tambe casnan di antaño na Alto Vista y pronto instalacion di Seyo di Monumento Protegi , cu ta identifica y reconoce oficialmente e monumentonan cu tin un balor historico y cultural unico pa Aruba, na Brasil.

E trabounan aki ta confirma e compromiso di Gobierno pa cuida y preserva e patrimonio historico di Aruba. Door di colaboracion cu propietario, fundacion, experto y otro partnernan, Gobierno ta continua inverti den e monumentonan cu ta conta e historia di nos pueblo y fortalece nos identidad como pais. E meta ta cu e futuro generacionnan por conoce, aprecia y sigui construi riba e herencia unico cu Aruba a ricibi.