Reparatietoeslag pa pensionadonan ta aumenta cu 30 florin pa luna
ORANJESTAD - Recientemente, Ministerio di Finansa y Cultura a anuncia cu e Reparatietoeslag pa pensionado ta subi cu 30 florin y ta bira 200 florin entrante augustus 2024.
Durante di Cambio di Presupuesto 2024 Gobierno lo pone suma disponibel pa por aumenta e Reparatietoeslag di pensionado y trahadonan, pero a keda pendiente pa haci e calculonan necesario pa stipula con hopi por subi esaki pa e pensionadonan cu ta ricibi AOV y AWW y pa e empleadonan cu ta gana un salario bou di 2500 florin pa luna.
E aumento di 30 florin riba e 170 florin di Reparatietoeslag pa pensionadonan ta entrante augustus 2024. Esaki ta nifica cu tur pensionado di SVB a cobra e suma di 200 florin na Reparatietoeslag ora e pago di pensioen a pasa riba dia 31 di juli 2024. Segun SVB a informa, un total di 19.548 pensionado di AOV y 1.336 pensionado di AWW ta cobra e 200 florin aki.
E Reparatietoeslag pa trahadonan cu ta gana menos cu 2500 florin pa luna ta subi cu 50 florin y ta bira 175 florin entrante augustus 2024. Den e siguiente dianan Departamento di Impuesto lo
publica e tabel pa oficialisa e aumento aki.