Renobacion di 141 cas den Village
ORANJESTAD - Fundacion Cas Pa Comunidad Arubano (FCCA) ta cuminsa cu renobacion di 141 cas den Village y ta busca solucionnan duradero pa comunidad.
Cu e inicio oficial di e proyecto di renobacion den Village, directora comercial di Fundacion Cas pa Comunidad Arubano (FCCA), Julie Wever, a expresa su satisfaccion cu e progreso cu ta logrando den diferente bario di Aruba. Segun Wever, e meta principal ta pa eleva e calidad di bida di e residentenan y crea comunidadnan unda hendenan por biba cu orguyo y dignidad. “Awe nos ta inaugura e proyecto di renobacion di Village y mi ta sumamente contento,” Wever a expresa. “Nos ta pasa bario pa bario pa trece tur bario na un nivel caminda nos ciudadano por biba cu dignidad.”
Segun Wever, e proyecto no a nace di un dia pa otro. Durante varios luna, FCCA a traha den preparacion, planificacion y coordinacion pa haci posibele trabounan cu awo ta cuminsa. E directora comercial a enfatisa cu e exito di e proyecto ta resultado di e trabou di un ekipo di FCCA. “Sin nos team nos no por a logra esaki,” Wever a bisa. “Tin hopi preparacion nos dilanti. Bo mester prepara e trabou, haci e proceso di aanbesteding y despues coordina cu cada residente individualmente.”
E proyecto lo cubri 141 cas den Village. Pa logra esaki, FCCA lo traha directamente cu cada famia pa coordina e trabounan di mantencion y garantisa cu e proceso ta desaroya di un manera ordena y eficiente. Wever a gradici Gobierno di Aruba pa e apoyo constante cu FCCA ta ricibi den e diferente proyecto nan. “Gobierno ta para banda di nos y ta pensa hunto cu nos riba con nos por sigui mehora nos comunidadnan,” Wever a expresa. “Ta hunto so nos por logra resultado.” Ademas di e renobacion di e casnan, FCCA ta mantene dialogo cu Gobierno pa mira con por mehora tambe e infrastructura y e area publico rond di e bario. Segun Wever, e enfoke ta riba solucionnan cu ta duradero. “Nos no ta busca un solucion pa un rato,” Wever a declara. “Nos kier solucionnan duradero, cu por garantisa continuidad y cu e bario ta sigui limpi, bon manteni y agradabel pa biba.”
Cu e inicio di e proyecto den Village, FCCA ta sigui construyendo riba su compromiso pa fortalece comunidadnan y contribui na un mehor calidad di bida pa miles di famia Arubiano.