Rapport di Fintech presenta na stakeholders.
ORANJESTAD – Riba 14 di augustus Minister di Finansa, Asunto Economico y Sector Primario, Geoffrey Wever, a presenta e rapport final di FINTECH na tur stakeholders local.
Minister Wever a ricibi e estudio final riba e riesgonan, obstaculonan y oportunidadnan di e sector di FINTECH pa Aruba y evaluacion di e impacto di “Blockchain Technology” y “Crypto Currency” riba 12 di augustus.
FINTECH ta tecnologianan innovativo y solucionnan digital cu por aplica den e sector financiero pa haci servicionan financiero mas eficiente, accesibel y facil pa uza. Como meta di e maneho economico pa crea mas sectornan economico, ministerio di Finansa, Asunto Economico y Sector Primario, a financia e estudio aki realisa pa “United Nations Economic Commission for Latin America and the Caribbean” (UN ECLAC).
Pa por a complementa e estudio aki ECLAC a reuni diferente stakeholders riba nos isla manera Banco Central di Aruba, Camara di Comercio, ATIA, Setar N.V., Cybersecurity Center of Excellence, Insurance Association of Aruba, Aruba Bankers Association, Digicel, Directie Telecommunicatie Zaken, Qredits Aruba, Gamma IT como tambe diferente personanan clave cu ta forma parti di e sector di FINTECH.
Durante e presentacion stakeholders cu tabata presente a haya un bista di e posicion actual di Aruba pa cu e sector FINTECH. Kico ta e fortalesanan, e debilidadnan, e peligernan pero tambe e oportunidadnan pa por implementa tecnologianan innovativo y solucionnan digital nobo den e mundo comercial. Esaki ta un proyecto cu a inicia ya caba for di 2021.
“Digitalisacion, Blockchain y Crypto no ta cosnan di futuro mas pero cosnan actual,” Minister Wever a cuminsa ta bisa, “Ta importante pa como pais nos sigui e desaroyonan aki di cerca y implementa esakinan unda cu por, pa asina como pais nos no keda para na banda y cay atras.”
A termina e presentacion cu un session di Q&A pa esnan presente por a haci pregunta.
Minister Geoffrey Wever ta gradici un biaha mas e delgacion di UN-ECLAC pa e estudio realisa y como tambe Departamento di Asuntonan Economico cu a guia e proceso.
Awor cu a finalisa y presenta e studio, lo evalua e feedback ricibi for di stakeholders y cuminsa traha riba e strategia di implementacion via Landspakket y ehecuta esaki pa asina na un manera concreto y regula implementa diversificacion di Aruba su economia.