Pueblo invita pa atende simposio di Economia Oraño: Explora e Futuro di Industria Cultural y Creativo
ORANJESTAD -Aruba ta cla pa explora e potencial di su industria cultural y creativo (CCI) na e Simposio di Economia Oraño, cu lo tuma luga 27 di mei, 2024, na The Hub at San Nicolas for di 13:00 pa 18:00 p.m.
Meta di e simposio ta pa stimula dialogo tocante con CCI por contribui na crecemento y desaroyo sostenibel den e paisahe creativo di Aruba, ofreciendo un plataforma pa discusionnan informativo, oportunidad pa network, y colaboracion entre participantenan.
E Simposio di Economia Oraño ta un iniciativa di Ministerio di Asunto Economico, Comunicacion y Desaroyo Sostenibel y Aruba Investment Agency (ARINA), cu tin como meta pa stimula crecemento y desaroyo di e industrianan cultural y creativo di Aruba (CCI).
Discusion interactivo na mesa lo explora aspectonan crucial di e CCI na San Nicolas, invitando aporte y ideanan di expertonan di e industria y sector publico, empresarionan y publico general interesa pa duna rumbo na e futuro di e industrianan creativo di Aruba.
E evento aki ta marca un stap importante pa defini y promove Economia Oraño di Aruba. Gobierno ta anticipa discusionnan informativo, colaboracion, y e visionnan pa un futuro briyante pa nos industrianan cultural y creativo.
Por registra pa e Simposio di Economia Oraño cu ta completamente gratis, riba www.investinaruba.com.
Pa mas informacion, tuma contacto cu: Zuleika Quant na z.quant@deaci.aw