Proyecto di Agroforesteria ta continua diasabra 12 di october

Na 2022 a cuminsa instala hardinnan di alimentacion unda cu muchanan di scol basico por siña planta, cuida y cosecha berdura y fruta y total a instala 11 hardin cu tabatin como efecto un nivel di participacion halto di gran parti di nos comunidad. Alumno, mayor, docente, bisiña y boluntarionan a bin hunto pa asina instala cada un di e hardinnan aki y siña un poco di agricultura.

Awo lo trece e hardinnan di alimentacion na otro areanan di nos comunidad manera instancianan social, scolnan secundario y comunidadnan di bario. Tin un interes grandi entre adultonan pa cu plantamento y e proyecto aki specifico. Proyectonan asina ta duna adulto mayor, esnan cu ta bibando den situacionnan dificil y comunidad en general, e oportunidad pa traha cu un hardin di alimentacion.

Kico ta e metanan di e proyecto aki? 

1. Siña nos hendenan con pa planta y cosecha y asina hisa e nivel di conocemento di agricultura den nos comunidad. 
2. Hisa e nivel di siguridad di alimentacion riba nos isla. Si nos hendenan siña planta nan lo siña come y biba for di nos mesun tera. 
3. Tur e puntonan aki ta contribui na un plan mas grandi di haci di nos sector primario un otro pilar economico. Inculcando tur e habitonan aki den nos hendenan lo crea un comunidad cu ta prepara pa fortalece nos sector primario, creando un mercado robusto cu hopi oportunidad. 

Schedule Agroforesteria 2.0: 

• Sportboys Club, october 12. 
• SPO Brazil, october 26. 
• Nos Fuente (tentatief), november 2. 
• Bureau Orthopedagogisch Centrum, november 9. 
• Club Kibrahacha 60+, november 16. 
• Imeldahof, november 23. 
• Fundacion Contra Violencia Relacional, december 14. 
• Maria College, januari 18. 

Ministerio di Naturalesa ta encurasha nos comunidad pa bin yuda riba e fechanan aki. Lo bo brinda un gran ayudo y siña con pa planta y traha cu e metodo di Syntropic Agroforestry. E trabou di instalacion no ta uno facil pero mientras mas man tin na obra, mas facil e ta