Proteha bo mascota y bo famia contra Rabies!

E dia aki tin como meta principal pa lanta conscientisacion tocante e prevencion di rabies (rabia) y pa destaca e progreso cu ta haci pa elimina e malesa mortal aki.  

A scoge e fecha di 28 di september specialmente pa conmemora e aniversario di fayecimento di Louis Pasteur, e cientifico y microbiologo Frances cu a desaroya e prome vacuna eficas contra rabies.  

Awe, den cuadro di Dia Internacional di Rabies, Departamento di Salud Publico (DVG) kier corda comunidad riba e importancia pa ta un doño responsable y tene nos mascotanan protegi contra e virus mortal aki. 

Esaki tambe en conexion cu e maneho nobo cu Gobierno di Aruba, pa medio di Ministerio di Salud, Cuido di Adulto Mayor y Adiccion, hunto cu Directie Volksgezondheid (DVG) lo implementa pronto pa bienestar di bestia y comunidad henter 

Rabies ta un malesa viral grave cu ta afecta e sistema nervioso y cu por pasa di animal pa hende (normalmente via un mordi of rasca)  

P'esey, ta fundamental pa bo ta atento na e señalnan di alerta den bo cacho:

• Cambio drastico den comportamiento: Un cacho trankil por bira masha agresivo of un animal cariñoso por isola su mes; 
• Baba excesivo: Hopi baba y dificultad pa guli cuminda of awa; 
• Desorientacion y paralisis: Dificultad pa cana, spiernan debil of atakenan;  
• Sensibilidad extremo: Reaccion fuerte of agresivo na luz, zonido of ora ta mishi cu ne. 

E unico prevencion efectivo: Vacunacion  

Vacuna bo cacho na tempo ta e unico manera pa preveni e malesa aki 

Un cacho no-vacuna cu keda contagia ta bira un peliger serio pa bo famia y pa henter e comunidad 

Si bo cuida bo mascota, bo ta cuida bo mes y bo sernan keri 

Laga nos tur cumpli cu e vacunacion di nos mascotanan!