Pronto Aruba tin su prome Cafe/Restaurant inclusivo; opera pa personanan cu limitacion

E acuerdo ta encera un cooperacion nobo/adicional entre ambos entidad.

Prome Minister mr. Mike Eman hunto cu representantenan di Stichting Trampolin pa Trabou, Caroll Kock y Marlyne Maduro a firma e acuerdo cu ta pone inclusion como e meta principal. Nos hobennan cu limitacion lo haya e oportunidad pa briya y bira e piesa principal den e proyecto aki.

Gobierno ta duna tur cooperacion pa MFA Paradera fungi como e ubicacion pa e prome Café/Restaurant den cual hobennan special di 17 aña bay ariba lo ta esnan cu lo carga e un proyecto asina. Nomber di e cafe aki ta "One of a Kind"

Premier Eman a remarca e importancia pa cu Gobierno di coopera cu e fundacion, como cu ta e oportunidad cu lo kier brinda na e comunidad cu limitacion, mirando e gran talento y capacidad cu nan tin pa ofrece.\

Gobierno ta pone na disponibilidad e espacio, como cu esaki tabata netamente e intencion na momento di diseña cada edificio di MFA, esta un Café pa sirbi e comunidad cu ta haci uzo di e facilidadnan di MFA den cada bario.

E espacio awo ta na disposicion y ta keda awo na Stichting Trampolin pa desaroya e café One of a Kind bou engargo di hobennan cu limitacion. Esaki realmente ta algo unico y "one of a kind". 

Prome Minister Eman a expresa su gratitud na e fundacion importante aki y a felicita nan pa e excelente  trabou cu nan a bin ta haci pa personanan cu limitacion riba nos isla. E iniciativa aki ta engrandece aun mas e fundacion den su tarea di inclusion den nos comunidad. E proyecto manera "One of a Kind" ta alinea cu e vision pa cual a crea e MFA tur rond di Aruba. Pa trece comunidadnan hunto bao un solo dak y aporta na e bienestar comunitario. Mester remarca tambe cu e cooperacion lo ta sin costo alguno, asina dunando e inicitava bunita aki un rosea financiero. 

President Stichting Trampolin pa Trabou Marlyn Maduro a splica cu e idea aki a inicia algun aña pasa, awo ta mira cu pronto lo bira un realidad.

Maduro ta gradici di curason e apoyo, e confiansa y tur cu tabata presente durante e firmamento entre otro Dino Stichting, exito na e team cu lo inicia e proyecto aki y un invitacion na Aruba henter na momento cu porta habri.

Fusiedirectuer/Merger Director na Sonrisa, Fundacion Trampolin pa Trabou, Stichting Ambiente Nobo Caroll Kock cu indica e fecha caminda cu ta marca historia, caminda a yega na un acuerdo cu Gobierno, caminda lo habri e One of a Kind Café den MFA Paradera.

Ta programando un soft opening dia 29 y 30 di september, y un grand opening event dia prome di october. Un proyecto asina aki ta marca historia pa Aruba.

Den region y rond mundo un establecimento asina ta usual, pero pa Aruba esaki lo ta un primicia. Cu intencion di sirbi desayuno y almuerso. Desde prome di october en adelante ta manda un invitacion cordial na e pueblo di Aruba pa pasa saboria un dushi desayuno y lunch. 

En conexion cu Dia internacional di Koffie, cu ta dia prome di october, lo tin koffie gratis pa tur cu lo bin celebra cu One of a Kind durante su apertura oficial. Aportando na e proyecto, lo tin un One of a Kind Coffee blend disponibel, cu ta for di proveedor local Cunucu Coffee Roasters cu lo zorg cu e Café lo tin su propio blend pa sirbi e comunidad.