Prome Minister Mike Eman y Minister Gerlien Croes ta participa na conmemoracion historico di 250 aña di First Salute na Sint Eustatius
ORANJESTAD – Riba 16 di november 2026, Prome Minister Mike Eman y Minister Gerlien Croes a representa Aruba na e conmemoracion historico di 250 aña di First Salute na Sint Eustatius, un acontecimento cu ta marca un momento importante den historia di independencia di Merca y e relacionnan historico entre e pais aki y Reino Hulandes.
E ceremonia oficial a tuma luga na Fort Oranje, den presencia di Su Mahestad Rey Willem-Alexander, Secretario di Estado pa Relacionnan den Reino Eric van der Burg, Embahador di Merca pa Reino Hulandes Joseph V. Popolo y diferente otro dignatario. E conmemoracion ta recorda e acontecimento di 16 di november 1776, ora cu e bapor militar Mericano Andrew Doria a drenta waf di Sint Eustatius y a haci un saludo di cañon. Bou di instruccion di gobernador Johannes de Graaff, Fort Oranje a contesta e saludo, un accion cu a bira conoci como e First Salute.
Ta considera e momento aki como e prome reconocemento simbolico di bandera di Merca door di un pais, poco luna despues cu e Merca a declara su independencia. E acontecimento a duna Sint Eustatius un posicion special den historia di independencia Mericano.
Ceremonia historico na Fort Oranje
E ceremonia a cuminsa cu hisamento di e banderanan di Hulanda, Merca y Sint Eustatius, acompaña pa cont di e himnonan nacional y palabra di bonbini di Gobernador di Sint Eustatius, Alida Francis. Su Mahestad Rey Willem-Alexander a dirigi palabra den cual e la reflexiona riba e importancia historico di First Salute y e contribucion di Sint Eustatius na historia di Merca. Den su discurso, Rey Willem-Alexander a dedica atencion tambe na e pasado di sclavitud di Sint Eustatius y e papel di Reino Hulandes den e sistema colonial. Asina, e conmemoracion no ta solamente celebra un momento historico di libertad, pero ta crea espacio tambe pa reflexiona riba e historia doloroso di e personanan cu tabata biba den sclavitud.
Durante e ceremonia, diferente representante di St. Eustatius a dirigi palabra. E programa a inclui tambe varios presentacion musical y cultural, den cual e comunidad di Sint Eustatius ta demonstra su identidad, historia y tradicion. Un di e momentonan central di e conmemoracion ta e recreacion di e historico saludo di cañon. Un bapor militar Mericano a participa cu un saludo di 13 cañon, mientras cu for di tera ta contesta cu 11 cañon. E ceremonia ta inclui tambe participacion di avion militar di Merca. E saludo simbolico aki ta recorda e momento di 250 aña pasa y ta reafirma e relacion historico entre Sint Eustatius y Merca.
Inauguracion di Museo Fort Oranje
Otro momento importante di e conmemoracion ta e inauguracion di Museo Fort Oranje unda Rey Willem-Alexander a haya e honor di corta cinta. E museo, situa den e fortalesa historico, ta presenta e historia di Sint Eustatius for di diferente perspectiva, incluyendo e papel di e isla den comercio internacional, First Salute y su pasado colonial. Atencion special ta bay na e historia di sclavitud y e experiencia di e personanan cu a sufri bou di e sistema aki.
Aruba presente na un momento historico pa Reino y region
Cu nan presencia na Sint Eustatius, Prome Minister Mike Eman y Minister Gerlien Croes ta forma parti di un conmemoracion cu ta reuni e comunidad local, e representantenan di Reino Hulandes y dignatarionan di Merca. E conmemoracion di 250 aña di First Salute ta resalta e papel historico cu un isla chikito den Caribe a hunga den desaroyo di un di e nacionnan mas influyente di mundo.
Pa Aruba, e participacion na e acontecimento aki ta representa un oportunidad pa honra e historia comparti di nos region y e lasonan historico cu ta conecta e islanan Caribense cu Hulanda y Merca. E conmemoracion ta pone enfasis no solamente riba historia, pero tambe riba e importancia di preserva nos patrimonio, fortalece amistad entre e paisnan y transmiti e conocemento di nos pasado na futuro generacion.
