Prome Minister Mike Eman a ricibi delegacion di Nationaal Slavernijmuseum na Bestuurskantoor
ORANJESTAD - Prome Minister Mike Eman a ricibi na Bestuurskantoor director/bestuurder di Nationaal Slavernijmuseum, John Leerdam, hunto cu Franc Weerwind, anterior Minister di Rechtsbescherming y actualmente waarnemend burgemeester di Terneuzen y presidente di Raad van Toezicht di e museo, y Ashley Chin, consehero di directiva. E delegacion ta na Aruba den cuadro di un bishita di trabou.
E encuentro a brinda espacio pa intercambia idea tocante e desaroyo di Nationaal Slavernijmuseum y particularmente, e importancia di incorpora e historia, perspectiva y experiencia di Aruba y Caribe den e relato cu e museo kier conta.
E museo tin como mision pa presenta e historia completo di pasado di sclavitud Hulandes den tur su dimensionnan. E vision ta cu un relato integral, cu diferente perspectiva, cu por contribui na reconocemento, comprension y un sociedad mas di igualdad den henter Reino.
Un aspecto importante ta cu Nationaal Slavernijmuseum ta desaroya como un museo cu alcance pa henter Reino, den cooperacion cu partnernan, entre otro, den e parti Caribense di Reino. Segun e organisacion, e historia y conocemento presente den e islanan ta indispensabel, considerando cu un parti importante di e historia transatlantico di sclavitud a tuma lugar den Caribe y su impacto ainda ta perceptibel awe.
Durante e encuentro, atencion special a bay pa e manera cu e museo por conecta di forma cuidadoso y significativo cu contexto Arubiano. Pa Prome Minister Eman, cu tin Cultura bou di su responsabilidad, a indica cu participacion di Aruba den e proceso ta importante pa percura cu nos propio historia, experiencia y perspectiva haya un luga adecuado den e relato mas amplio di Reino. E intercambio tocante posicionamento di e museo y su conexion cu Aruba tabata precisamente un di e metanan principal di e bishita.
Nationaal Slavernijmuseum tin su origen den un deseo cu pa hopi aña a biba den comunidadnan Afro-Caribense pa logra mas reconocemento pa pasado di sclavitud. Na 2017, Gemeente Amsterdam y Ministerio Hulandes di Onderwijs, Cultuur en Wetenschap a inicia e proceso pa establece e museo. Despues di un trayectoria amplio di participacion y dialogo den Reino y Surinam, e plan “Vertel het hele verhaal” a forma e base di contenido pa e museo. Stichting Nationaal Slavernijmuseum ta formalmente estableci desde 17 di april 2025.
Prome Minister Eman a aprecia e oportunidad pa conoce e delegacion y intercambia pensamento tocante e iniciativa. E encuentro ta forma parti di e dialogo necesario pa percura cu, den construccion di un relato comparti di pasado, bos y perspectiva di Aruba tambe ta haya e espacio cu nan merece.