Prome Minister Dick Schoof a reuni cu Prome Minister Mike Eman

E bishita di trabou cerca sr. Schoof ta pa dialoga riba locual ta di importancia pa pais Aruba, entre otro turismo y locual a discuti durante su bishita recien na Aruba.

“Pa locual ta trata Rijkswet, nos ta riba hopi bon caminda” ta locual e prome Minister Schoof a expresa. Esaki lo bay trata den e siguiente Rijksministerraad diabierna awo, y Prome Minister Eman tambe lo ta presente.

E ta importante di por intercambia pensamento cu e mandatario di mas halto na Hulanda, riba temanan cu pa e proximo añanan ta prioridad pa Aruba. Un bon relacion den Reino ta crea stabilidad y confiansa den Aruba. Mas inverti den esaki y mas sano e relacion aki ta, miho e ta pa Aruba.  

No unicamente e Rijkswet cu na e momento aki nifica un reduccion di 20 miyon florin pa pais Aruba na interes cu mester paga, pero e echo cu tin acuerdo cu Hulanda riba un tema asina importante.  

Prome Minister Eman ademas a toca e tema di ‘investerings fonds’, poni den un contexto poco mas amplio, pa henter Reino Hulandes, den cual Aruba, Corsou, Sint Maarten lo contribui, na beneficio tambe di islanan BES. Tur ta tema cu a discuti den anticipacion cu demas islanan, pa logra yega na un Koninksrijk investeringsfond, den combinacion cu un fondo cu lo t’ey pa stabilidad, pa reserva, si un dia lo presenta cualkier situacion manera COVID, lo tin un reserva na beneficio di e islanan.

Prome Minister tambe a reuni na Hulanda cu Lider di Fraccion den Tweede Kamer y lider di partido politico GroenLinks-PvdA. Anticipando e papel vital di Sr. Timmermans den e siguiente coalicion Hulandes, Prome Minister Eman a comparti su vision y a presenta algun idea pa cual e Gobierno Hulandes lo tin un rol importante. 

A accentua e posibilidad pa Universidad di Wageningen tuma un posicion mas proactivo na Aruba, den crea un desaroyo socio-economico ekilibra cu naturalesa, cual ta algo cu henter Caribe tin nececidad p’e.