Prome Minister a reuni cu Presidente nobo di UNHCR

UNHCR ta un agencia di Nacionnan Uni cu ta atende cu derechonan humano. 

Gobierno a acredita representantenan di UNHCR na Aruba y desde 2018 Aruba tin dos representante acredita y reconoci. Ademas a apunta sra. Gina Lopez-Gnecco como Ketenmanager Venezuela, cu den nomber di Gobierno ta atende cu e instancianan aki y cu tur instituto cu ta traha riba tereno di refugiado. Asina tin un linea di comunicacion mas directo habri pa cu esaki y te na e momento aki esaki ta trahando hopi bon.

Cu UNHCR, e topiconan semper ta trata e cooperacion y con por traha hunto na e miho manera ya cu e realidad ta cu Aruba tin un cantidad grandi di persona indocumenta. Mayoria di e personanan ta di Venezuela pero tambe di Colombia y otro nacionalidad y ta importante pa tene cuenta cu e bienestar di e personanan aki.

Na Aruba mes tin varios organisacion activo y UNHCR ta un di nan y Gobierno lo yuda unda cu por. Minister di Labor, Energia y Integracion, sr. Glenbert Croes a anuncia un “Alternative Legal Pathway”, cu ta un forma cu un persona no documenta por yega na haya un permiso na Aruba. Minister Croes a menciona cu si e persona a drenta Aruba legalmente y tin opcion cu un doño di trabou ta dispuesto pa firma p’e, y e persona aki no tin antecedente penal, e por yega na remarke pa haya su permiso. Esey ta e “Alternative Legal Pathway” y UNHCR ta hopi satisfecho cu alternativa aki.

Apesar di esaki, UNHCR ta mira cu tin retonan ainda y cu ta importante pa sigui papia di esakinan. UNHCR ta haci diferente investigacion, ta atende cu e personanan cu mester di e ayudo y esey ta algo di aprecia.