Prome Minister a entrega Secretario di Estado di Relacionnan di Reino Eddie van Marum un buki arkeologico unico tocante Tanki Flip

E trabou The Archaeology of Aruba: The Tanki Flip Site ta contene e descripcion cientifico detaya di un di e descubrimentonan arkeologico mas importante den Caribe: un excavacion completo di un colonia Caquetio, cu structuranan den cual nan tabata biba, artesania, artefactonan di cocolishi y piedra, y un bista unico riba e organisacion social, economico y spiritual di e comunidad nativo Arubano.

Prome Minister Eman a duna un splicacion cortico di e balornan y estilo di bida di e Caquetionan nativo, entre otro, nan sentido di comunidad, harmonia cu naturalesa, conectividad social y respet pa tera, cu a influencia permanentemente e cultura y normanan di e Aruba moderno.

Mirando cu e Secretario di Estado tin un background den agricultura, Eman a mustra van Marum un mapa di e excavacion con e Caquetionan tabata inventivo den maneho di awa riba e terenan seco. Door di adapta e rooinan natural y nan metodo di traha canal, nan a sa di uza efectivamente e tiki awa di yobida cu tabata cay. E capacidad pa sostene nan mes a haci cu nan  no solamente por a sobrevivi, pero tambe construi un comunidad stabil y floreciente den un ambiente di secura.

Durante e conversacion, Secretario di Estado Van Marum a referi na e cultura autosuficiente di e habitantenan wierden y terp di Groningen y Friesland. Un wierde (Groningen) of terp (Friesland) ta un cero artificial traha pa hende, for di rond 500 A.C. te despues di Edad Media, pa por keda seco den zonanan cu tabata inunda regularmente. E habitantenan, comunidadnan di agricultor, piscador y comerciante, tabata autosuficiente, cu sembramento (gerst, trigo, bonchi), cria di bestia y pesca. Mescos cu e Caquetionan di Aruba, nan tabata depende di nan mesun creatividad pa sobrevivi den luganan desafiante, cu cooperacion como un elemento esencial: lanta un wierde of terp tabata un trabao colectivo cu varios biaha tabata tuma generacionnan. Maneho di awa tabatin un rol crucial den esaki, aunke na Groningen y Friesland e tabata pa proteha e pueblonan contra inundacion, na Aruba e tabata hustamente pa uza efectivamente e tiki awa cu tin.
Secretario di Estado Van Marum a priminti Prome Minister Eman cu durante di su proximo bishita na Hulanda, e lo entrega un buki tocante e comunidadnan antiguo aki.

Prome Minister mes ta trahando riba un buki titula E alma di Aruba. Den esaki, ta pone atencion riba con e historia y cultura di e Caquetionan ta forma e fundeshi pa e imagen Arubano y e lucha pa bienestar comun.