Presentacion di dos publicacion tocante pasado di sclavitud y historia di Aruba
ORANJESTAD – Riba 3 di november a tuma luga na Universidad di Aruba presentacion di dos publicacion importante tocante e pasado di sclavitud y historia di resistencia contra colonialismo den Caribe.
Durante e actividad, historiador Luc Alofs a entrega Prome Minister Mike Eman a un ehempel di e di tres edicion di su buki Slaven zonder Plantage, mientras cu rector di Universidad di Aruba, Sue-Ann Lee, a entrega e rapport di investigacion Vergeten verhalen, verzwegen verleden.
Center for Lifelong Learning di Universidad di Aruba aorganisa e evento, cu participacion di un cantidad grandi di invitado. E buki Slaven zonder Plantage ta enfoca riba un parti importante di historia di Aruba cu durante hopi tempo no a ricibi suficiente atencion. Aunke Aruba no tabatin plantacion grandi manera otro isla den Caribe, sclavitud tabata un realidad den sociedad Arubano.
Segun e introduccion di e buki, na 1849, 21% di poblacion di Aruba tabata sclavisa, mientras cu riba 1 di juli 1863 casi 500 habitante di Aruba a haya nan libertad como resultado di abolicion di sclavitud. E di tres edicion di e buki ta incorpora investigacion historico nobo y informacion obteni for di e archivonan digitalisa. E publicacion ta profundisa den e circunstancianan di bida di hendenan sclavisa, nan venta y e diferente maneranan cu nan por a ricibi nan libertad.
A realisa e edicion nobo den cuadro di e disculpanan oficial cu Hulanda a presenta pa su rol den e pasado di sclavitud. E otro publicacion, Vergeten verhalen, verzwegen verleden, ta un rapport di investigacion cu ta examina con e historia di resistencia contra sclavitud y colonialismo, y e personahenan cu a lucha pa libertad, ta haya atencion den enseñansa den parti Caribense di Reino Hulandes. E investigacion, realisa na peticion di Tweede Kamer, ta mustra cu historia di diferente personahe cu a lucha contra colonialismo y sclavitud no ta ricibi suficiente atencion den enseñansa. E rapport ta destaca e necesidad di fortalece e material educativo y duna mas espacio na historia local.
E dos publicacion ta representa un contribucion importante na investigacion y preservacion di historia di Aruba. Nan ta yuda amplia conocemento di nos pasado y ta destaca e importancia di transmiti e historia aki na futuro generacion.