Presentacion di buki Keda leu di cangreu di Eddy Oduber

ORANJESTAD - Eddy Oduber ta presenta su buki ‘Keda leu di cangreu’ diahuebs dia 19 di november 2026, na Biblioteca Nacional Aruba. 

Presentacion ta cuminsa 7or. E buki ‘Keda leu di cangreu’ di Eddy Oduber ta un buki cu ta invita e lector pa pensa, reflexiona y comprende su mente mihor y comprende dicon nos ta actua manera nos ta actua.

Eddy Oduber ta un empresario local cu hopi aña di experencia den ramo di salud y bienestar. Banda di su trayectorio empresarial, durante mas cu 20 aña ela dedica gran parti di su tempo liber na studia e mente, un tema cu a bira un di su pasionnan mas grandi. Su interes pa comprende dicon hende ta pensa, sinti y actua na cierto manera a hib’e na studia pa bira hypnotherapista na 2006. Na 2013 sr. Oduber a gradua como ‘Designated Certified Hypnotherapy y e ta ‘OMNI Hypnosis Training Center Instructor’. Un pregunta cu semper a fascine ta: “Dicon nos a bira e persona cu nos ta awe?”. E pregunta aki ta tambe na rais di su trabou como escritor. 

Un aspecto special di ‘Keda leu di cangreu’ ta cu e ta skirbi na Papiamento. Pa Eddy, tabata importante pa presenta conceptonan tocante mente humano den nos idioma, uzando historia y ehempel cu e lector por reconoce den nan propio bida. Comunidad ta bon bini na e presentacion diahuebs awor pa 7or di anochi.