Poder di Hubentud 2024 tabata un gran inspiracion

ATHA a organisa e "Awards Night" den cual e hobennan participante a briya cu nan creatividad y determinacion. E anochi aki tabata tin 57 hoben nomina di cual varios di nan a cumpli cu 6 siman di seminario pa por yega na nan propio proyecto. E proyecto cu e hobennan aki mester a bin cu ne, tabata algo innovativo pa comunidad, y e proyecto ganado lo ricibi subsidio for di ATHA pa haci esaki realidad.

E proyecto aki ta demostra e poder, deseo y inspiracion di cada un di e hobennan presente, y ta importante pa tene cada un na cuenta. Prome Minister Evelyn Wever-Croes, a duna di conoce cu normalmente, ora e duna un discurso, e ta purba inspira y motiva esnan presente, pero durante di e proyecto di Poder di Hubentud 2024, ta e mes a haya hopi inspiracion for di e hobennan cu a traha duro haciendo trabow comunitario y yudando esnan vulnerabel.

E ganado di e proyecto di Poder di Hubentud 2024 tabata den persona di e hoben Renderly Trimon, cu a bin cu e proyecto "Separa y Recicla". Hunto cu 15 hoben mas, Renderly mester a presenta su proyecto dilanti e huradonan presente, pa asina logra yega na e titulo maximo.