Plasa Comercio ta marca comienso di revitalisacion di Oranjestad
ORANJESTAD – Diamars 20 di februari 2024, den presencia di Gobernador di Aruba S.E. Alfonso Boekhoudt, varios Minister y miembro di Parlamento y algun invitado special, a tuma luga un ceremonia na Plasa Comercio unda oficialmente a desvela e plasa nobo situa na e crusada di Wilhelminastraat y Columbusstraat.
Pa e ocasion special aki Minister di Asunto Economico, Comunicacion y Desaroyo Sostenibel Sr. Geoffrey Wever a duna un discurso optimista pa e futuro di Oranjestad y a repasa e plannan pa e segundo fase cu ta mehoracion di iluminacion, parkeo y accesibilidad den Oranjestad. Parti di vision ta pa revitalisa e centro di ciudad y inyecta bida nobo den e nucleo di Oranjestad.Gobierno tin e rol pa facilita comercio, pa apoya e comerciantenan cu curashi y nan metanan comercial pa asina segura cu nan tin un fundeshi solido pa prospera.
Plasa Comercio situa den curason di Oranjestad, ta prepara pa bira un plasa y area culinario unda lo atrae turista y nos localnan pa disfruta y conoce e parti vibrante cultural di Oranjestad. Oranjestad ta bay celebra su 200 aña di existencia pues tin hopi historia interesante. E ubicacion y diseño di Plasa Comercio lo contribui na e crecemento economico di e area, promoviendo restaurantnan existente y atrae mas comercio den area manera tienda, boutique y espacio cultural cu por bira un atraccion turistico y unda nos localnan por disfruta. Plasa Comercio ta contribui asina na e ambicion pa posiciona Oranjestad como e Capital Culinario di Caribe.
Durante di e ceremonia special aki, a brinda un homenahe na e dos personahe cu a aporta grandemente den desaroyo di Oranjestad, esta Sr. Bruno Justiniano “Brenchie” Arends, y Sr. Angel Botta, kende nan contribucion a yuda forma e identidad cultural y comercial di Oranjestad.
E inauguracion di Plasa Comercio no ta solamente un logro fisico, pero un simbolo di e aspiracion colectivo pa revitalisa y reimagina e centro di ciudad como un luga di comercio, cultura, y comunidad.