Personal di DAC a ricibi training di ICAO na Aruba

Esaki a tuma luga na Aruba mes door di dos instructor di ICAO. E training ta specificamente pa e evaluacion y monitoreo di sistemanan di maneho di siguridad operacional (“SMS”). Tur organisacion cu ta activo den aviacion mester desaroya y implementa un programa di SMS y mester presenta esaki na DAC pa evaluacion. Pa medio di un sistema di SMS e compania por maneha su riesgonan a base di metanan concreto y defini.

Un beneficio grandi di e programanan di SMS ta cu e ta suministra DAC cu informacion (“safety intelligence”), cual combina cu data di “safety reports” y inspeccion ta forma e base pa maneho di siguridad operacional aereo. Cu e monitoreo di data aki, DAC por identifica tendencianan y asina pasa pa un sistema predictivo pa maneha riesgonan den aviacion. Esaki ta un transicion cu ta tumando lugar den aviacion mundialmente.

E training a duna personal di DAC e “skillsnan” necesario pa evalua y monitorea e sistema di SMS. E instructornan a elogia e grupo di profesionalnan pa nan conocemento, experiencia, participacion activo y aporte importante durante e curso.

Hopi di e actividadnan di DAC no ta den spotlight, pero ta di suma importancia y necesario pa segura e nivel di siguridad operacional. E personal tecnico di DAC, cual ta consisti di tanto beleidsmedewerkers como inspecteurnan y ta haci diferente actividad pa por garantisa siguridad operacional den aviacion. Pa por haci e trabaonan aki, ta esencial pa e personal tecnico ta qualifica y bon entrena den tur e areanan di aviacion. Solamente asina por garantisa un nivel di siguridad operacional aceptabel pa e biahero y tambe un nivel di cumplimento halto di ICAO. Un aviacion sigur, confiabel, solido y duradero ta di suma importancia pa Aruba su turismo y economia.

Un di e strategianan di ICAO, ta pa fomenta mas profesional femenino den e industria di aviacion, pa cual ICAO a manda dos instructor femenino y encurasha participacion di personal femenino. Actualmente DCA tin varios profesional femenino cu ta forma un parti integral di DAC y cu continuamente ta sigui desaroya nan mes den e industria di aviacion. Asina por mira cu recientemente un hurista femenino di DAC, sra. Marjanne Jarazagaray-da Silva a completa un postgrado den derecho aeronautico.

DAC kier a uza e oportunidad tambe pa informa tocante su portal pa raporta incidente. Tanto profesionalnan den aviacion y publico general por raporta, di forma anonimo, cualkie situacion cu nan ta pensa por afecta siguridad di aviacion.