Paspoortpiek
ORANJESTAD - Debi na e aumento na anja 2014 di e periodo di validez (di 5 pa 10 anja) di e paspoortnan Hulandes pa personanan mayor di 18 aña, ta premira un aumento drastico e aña aki riba e cantidad di peticionnan pa paspoort nacional di personanan na cual nan paspoort a vence na 2024.
Esaki kiermen cu e tempo di espera pa citanan encuanto paspoort nacional na Censo ta mas largo. E tempo di espera encuanto entrega di e paspoortnan door di e proveedor na Hulanda tambe ta mas largo. Censo ya caba a anuncia esaki na luna di october aña pasa y a adverti pa haci e peticion pa paspoort nacional na tempo.
PASPOORT DI EMERGENCIA
Den casonan asina tampoco tin sentido pa haci un peticion pa un paspoort di emergencia na e departamento consular di Gabinete di Gobernador di Aruba. Esaki ta solamente posibel den casonan real di emergencia (por ehempel biahenan di emergencia medico via AZV) y no ta un alternativa den caso cu no ta haya e paspoort nacional na tempo. E maneho aki encuanto paspoortnan di emergencia ta aplica estrictamente dor di e departamento consular di Gabinete di Gobernador di Aruba.
CITANAN NA E DEPARTAMENTO CONSULAR
E problema anteriormente menciona tambe tin su impacto den e tempo di espera pa un cita na e departamento consular di Gabinete di Gobernador di Aruba. No ta trata solamente e citanan encuanto peticion pa paspoort nacional of paspoort di emergencia, sino tambe e otro productonan, manera por ehempel e peticionnan pa (Schengen) visa y peticionnan pa e procedura pa obtene nacionalidad Hulandes via opcion y naturalisacion.
