Parlamento a ricibi nota di comienso di aña 2024

E Nota aki ta duna Parlamento un bista mas tempran di e cambionan den maneho cu a tuma luga y cu lo tin mester aprobacion di Parlamento. Esaki ta e di dos biaha cu Gobierno ta presenta un Nota di Comienso di Aña na Parlamento.

Na 2023 a entrega e prome Nota di Comienso di Aña na Parlamento. Te cu aña 2022, Aruba tabata conoce solamente un 'Najaarsnota' cu ta un 'Nota di fin di aña' den cual Parlamento despues di mita di e aña coriente ta haya informacion di e cambionan den su Presupuesto aproba y basa riba esaki e Minister di Finansa ta presenta un Presupuesto Supletorio den cual ta pidi Parlamento pa duna aprobacion si tin cambionan cu a tuma luga. Desde 2023, Minister di Finansa ta presenta un 'Voorjaarsnota' den cual na comienso di aña caba ta presenta e cambionan den e Nota di Comienso di Aña y hunto cu esaki ta presenta un Presupuesto Supletorio na Parlamento pa aprobacion.

Den e Nota di comienso di aña 2024, Gobierno ta adapta e cifranan di entrada na e ultimo crecemento economico conforme e ultimo prognosis haci pa Departamento Economico cu ta indica cu e economia di Aruba lo crece cu 3% den aña 2024. Den e Nota por mira e cambionan den maneho den cada ministerio y e cambio den e cifranan cu mester tuma luga pa haci esaki posibel. Den e Nota por mira cu tin un suma extra di impuesto cu a genera cu por destina pa realisa varios proyecto di importancia. Tambe tin fondonan cu Aruba ta haya for di Hulanda pa asina por ehecuta proyectonan di e Landspakket, manera e Huisartsenopleiding, cu tambe mester keda integra den Presupuesto 2024.

Mientrastanto Conseho di Minister a bay di acuerdo pa inclui e cambionan proponi den e Nota di comienso di aña 2024, den un Presupuesto Supletorio cu a manda pa Raad van Advies pa conseho despues cu CAFT a duna su opinion. Di eynan e Ley lo sigui cana su caminda pa por keda presenta na Parlamento di Aruba pa su tratamento y aprobacion.

E uzo di un 'Voorjaarsnota' of 'Nota di comienso di aña' den e ciclo presupuestario di nos Pais, ta brinda Parlamento informacion presupuestario na mas momento den un aña. Asina Parlamento por sigui e desaroyo di gasto y entradanan durante aña mas di cerca. Esaki ta yuda Parlamento di Aruba den su derecho di 'budgetrecht' y ta brinda mas transparencia na pueblo riba con e fondonan publico ta keda uza.