Orange Economy: Di vision pa accion pa stimula e industria creativo
ORANJESTAD - Recientemente, a tuma luga e Orange Economy Symposium den cual a elabora riba e diferente retonan den e mundo creativo comercial aki na Aruba, pero tambe ta reconoce e posibilidadnan creativo ilimita di nos artistanan local.
Economia Oraño ta encera cu e industria creativo ta ser considera como un pilar economico. Pa logra esaki mester empodera empresarionan pa eherce nan creatividad como actividad comercial. Diferente stakeholders a comparti nan experiencia y duna feedback di e retonan personal y señala e personanan activo den e industria creativo, sea den arte, musica, baile, diseño, of mas. Ministerio di Asunto Economico, Comunicacion y Desaroyo Sostenibel lo crea un Plan di Accion pa e Industria Creativo y a sigura cu lo implementa esaki.
E reto principal pa artistanan local por comercialisa nan creatividad ta e aspecto financiero. Minister di Asunto Economico, Comunicacion y Desaroyo Sostenibel Geoffrey Wever a indica cu por replica e modelo di AgriFund, cu a resulta un exito pa e sector di agricultura, cria y pesca, pa duna e sector creativo e sosten financiero.
Gobierno tin e intencion pa clasifica San Nicolas como un UNESCO Creative City - caminda ta pone industria creativo na e centro di su plan di desaroyo. Esey ta bay tuma esfuerso conhunto, pa cual e Symposium tabata un paso chikito pero importante. Lo tuma e feedback ricibi y lo enfoca riba metodonan pa stimula y empodera nos artistanan local, pa nan por eherce nan creatividad na nivel comercial y desaroya e industria aun mas.