Notarisportaal TERENO na DLV ta bira realidad
ORANJESTAD – Recientemente Dienst Landmeetkunde en Vastgoedregistratie (DLV) a lansa Notarisportaal TERENO.
Cu e lansamento di Notarisportaal TERENO, Aruba ta tuma un paso importante, un logro cu a bira realidad danki na e colaboracion entre Ministerio di Vivienda, Infrastructura, Servicio Interno y Telecomunicacion, Dienst Landmeetkunde en Vastgoedregistratie (DLV) y DataAxis como partner tecnologico, cu e meta pa simplifica y modernisa servicio cadastral, registro di propiedad y intercambio di informacion.
Pa DataAxis, tecnologia mester haci mas cu solamente mehora proceso, e mester contribui na mehora bida di hende. E vision aki ta forma e base di TERENO Geospatial Intelligence Platform, un plataforma digital cu ta busca pa conecta institucionnan cadastral, notarionan, institucionnan financiero y departamentonan di Gobierno den un ecosistema digital eficiente.
Como parti di e vision digital mas amplio, Notarisportaal TERENO ta representa un paso grandi pa modernisa e conexion entre notarionan y DLV. E portal ta permiti notarionan pa haya acceso digital na servicio cadastral y intercambia informacion electronicamente pa contribui na un proceso di registro di propiedad mas conecta, transparente y eficiente.
E digitalisacion di e proceso aki ta busca pa reduci obstaculonan administrativo y facilita tramite relaciona cu registro di propiedad y hipoteca. Di e manera aki, e plataforma ta contribui na un proceso mas accesibel pa e ciudadanonan cu ta desea di bira doño di nan propio cas.
Segun DataAxis, tras di cada transaccion cadastral tin un hende, tras di cada hipoteca tin un soño y tras di cada cas tin un famia cu ta traha riba su futuro.
Cu e filosofia “Building Better Communities Through Technology”, DataAxis ta reafirma su compromiso pa uza tecnologia como un herment pa fortalece comunidad y crea proceso mas eficiente, transparente y accesibel pa tur esnan involucra.
Gobierno di Aruba ta enfatisa cu e implementacion di Notarisportaal TERENO ta un ehempel concreto di su compromiso cu digitalisacion, innovacion y mehoracion continuo di servicio publico. E iniciativa no ta trata solamente un cambio tecnologico, sino un paso structural pa ofrece servicio mas eficiente, accesibel y orienta na e necesidadnan di ciudadano y usuario.
Minister di Vivienda, Infrastructura, Servicio Interno y Telecomunicacion, drs. Rene Herdé kier gradici su team, DLV, DataAxis, notarionan y tur cu a duna di nan banda pa laga Notarisportaal TERENO bira un realidad.
