No ta contemplando pa hisa edad di pensioen

Na 2020 e pandemia di Covid-19 a pone un presion substancial riba e posicion financiero di Pais Aruba te cu Aruba mester a bati na porta di Hulanda pa sosten financiero den forma di un prestamo. E fondonan aki tabata necesario pa yuda henter comunidad, entre otro pa e subsidio di salario pa tur trahado y FASE pa esnan cu a perde trabou pero tambe den forma di pakete di cuminda pa esnan den necesidad.

Hulanda di su parti, a mara Aruba na un cantidad di condicion pa por a ricibi e prestamo aki.  
Un di e condicionnan imponi unilateralmente pa Hulanda ta cu e edad di pensioen mester subi pa 66 of 67 aña. Mirando cu Aruba no tabata comparti e mesun pensamento cu Hulanda, pero di otro banda tabata depende riba e prestamo, a negocia y finalmente a yega na un palabracion.
Na 2025 lo haci un estudio pa mira (1) si e fondo di pensioen di AOV ta solido. Si e ta solido, no mester tuma ningun paso. (2) Si resulta cu e fondo NO ta solido, Aruba lo tuma e decision necesario pa mantene e fondo solido. Si acaso e fondonan di pensioen no ta solido, esaki por kibra y no por paga pensioen mas na pensionadonan cu a paga premies pa hopi aña.

Tin varios decision cu Gobierno por tuma si en caso cu e fondo ta exigi esaki. Un di nan por ta
aumento di e edad di pensioen. Un otro ta aumento di e premies, entre otro. Hecho ta cu na e
momento aki Gobierno no ta contemplando pa hisa e edad di pensioen, y lo haci e investigacion na 2025 y evalua tur alternativa prome cu hisa edad di pensioen.