Na luga publico, tene bo cacho na liña!

ORANJESTAD – Departamento di Salud Publico kier urgi doñonan di cacho pa tene nan cacho na liña den luganan publico.

Hasta un cacho cu ta amical por reacciona diferente den un ambiente cu zonido, otro animal, trafico of hende desconoci. P’esey, ora bo sali cu bo cacho, control directo ta esencial. Tene bo cacho na liña na luganan publico ta nifica ser un doño responsabel.

Segun Hondenverordening, un cacho mester ta na liña riba tereno accesibel pa publico, excepto den lugarnan unda ta indica otro. Gobierno por designa area unda cacho por cana sin liña y area unda entrada di cacho ta prohibi.

E liña ta evita cu e cacho ta core den trafico, acerca un mucha of otro animal sin permiso, causa un pelea of cu e ta perde. E ta duna e doño oportunidad pa interveni prome cu un situacion bira peligroso.

Tene bo cacho na liña no ta señal cu e cacho ta agresivo. E ta señal cu su doño ta responsabel y ta respeta espacio y siguridad di otro hende. Durante keiromento, percura tambe pa recoge su sushedad y evita molester pa comunidad.

Bo conoce bo mascota, pero bo no por controla tur loke ta pasa rond di dje. Uza un liña firme y mantene atencion. Un keiromento sigur ta responsabilidad di e doño, no di e persona of animal cu bo topa riba caminda. 

Pa un comunidad harmonioso, un doño di mascota responsabel alabes!

Base legal: Hondenverordening, articulo 4.

Sea bo tambe un doño di mascota responsabel. Cada acto di responsabilidad ta salba un bida.

Planta amor, proteha nan bienestar y hunto nos por logra un Aruba sin animalnan bandona.

Pa keda semper informa:

Doñonan responsabel ta tene nan cacho na liña.