Mpox declara un estado di emergencia mundial pa salud publico

Na mei 2022 WHO a bati alarma caba pa motibo cu casonan tawata keda raporta for di paisnan no endemico pa presencia di e virus. E situacion actual di Mpox no ta diferente y e virus di Mpox ta plamando rapidamente na Oost di Republica di Congo y den diferente otro paisnan bisiña. E rapidez cu e virus ta plamando tin WHO precupa cu esaki por plama riba tur continente. Despues cu WHO a declara un estado di emergencia pa salud publico, awe caba Suecia ta raporta su prome caso importa. Departamento di Salud Publico (DVG) lo sigui monitor di cerca e desaroyo rond di e virus di Mpox y lo sigui informa comunidad debidamente.

Sintoma

Mpox ta categorisa como un virus cu ta causa sintoma leve. Pa e grupo di riesgo, cu ta mucha, hende muhe na estado of persona cu sistema inmunologico comprometi, e virus por ta peligroso te hasta mortal.  
Sintomanan ta cuminsa cu keintura, dolor di cabes, kliernan hincha y dolor di curpa. Entre 1 te cu 3 dia despues di e keintura, ta aparece un rash cu den mayoria di e casonan ta afecta cara, mannan y pianan. E rash na su turno ta transforma den blaar cu pus aden. Por confundi Mpox cu otro malesanan manera Smallpox, Bruela, of Impetigo, pa cual motibo ta importante pa un persona cu e sintomanan aki tuma contacto cu nan dokter di cas pa haci test nesesario y haya diagnostico corecto.

Contagio

Contagio cu Mpox den paisnan no endemico, ta sosode di hende pa hende pa medio di contacto directo (close contact) cu un persona infecta. Esaki por sosode a travez di particulanan (droplets) cu e persona infecta, ora di tosa of nister. Tambe bo por keda infecta door di tin contacto cu e likido procedente di e blarnan presente cerca e persona infecta (skin to skin of paña contamina).

Tratamento y vacuna

Pa e virus specifico di Mpox no tin vacuna disponibel. E vacuna contra e virus di smallpox por brinda cierto grado di proteccion pero mundialmente tin scarsedad di e vacuna aki p’esey prevencion ta importante. Tampoco tin tratamento disponibel, unicamente tratamento di sintoma cu ta desaparece dentro di 2 pa maximo 3 siman.

Medidanan di higiena

Evita contacto cu hende cu ta sinti malo y laba man regularmente. Na momento cu diagnostica bo cu Monkeypox bo mester bay den isolacion te na momento cu no tin ningun casca mas  di e blaarnan visibel riba e curpa.  

Pa mas informacion sigui DVG riba Facebook page Directie Volksgezondheid DVG Aruba, subi www.dvg.aw, yama na 5224200 of manda un email na servicio@dvg.aw.