MOU Firma Entre FreeZone Aruba y Aruba Ports Authority pa Impulsa Modernisacion y Crecemento Economico

Cinco representante a firma e MOU: Minister Geoffrey Wever, Minister Wendrick Cicilia, Minister René Herde, Director di FreeZone Aruba N.V., Sr. Walter Mosher, y Director di Aruba Ports Authority N.V., Sr. Marc Figaroa. 

E firma conhunto ta refleha e compromiso y cooperacion entre e ministerionan y organisacionnan involucra pa sigui impulsa e desaroyo di FreeZone Aruba como un instrumento strategico pa crecemento y diversificacion di Aruba su economia. 

E acuerdo ta forma parti di e esfuersonan pa explora e desaroyo di un FreeZone moderno na Barcadera, cual ta un localidad strategico dor di su cercania cu e haf di carga.
Actualmente, ta transporta mercancia di e haf di Barcadera pa FreeZone na Bushiri y posteriormente bek pa Barcadera pa exportacion. Un eventual traslado di FreeZone pa Barcadera lo elimina e transportacion adicional aki, haciendo e operacionnan mas eficiente.

Ademas, actualmente e facilidadnan di FreeZone Aruba na Bushiri ta completamente ocupa y tin un lista di espera di negoshi interesa. E demanda aki, combina cu e ampliacion di actividadnan permiti den Free Zone desde 1 di januari 2026, ta demonstra e importancia di sigui crea espacio y oportunidad pa desaroyo futuro.

Durante e ultimo añanan, FreeZone Aruba N.V. a pasa door di un proceso profundo di reorganisacion y profesionalisacion, cu a resulta den un administracion financiero na ordo y dos aña consecutivo di resultado positivo. Despues di pone e fundeshi financiero y administrativo di e organisacion na ordo, instala un Director profesional nobo, y ampliacion di actividadnan, e enfoke awor ta riba sigui crea e condicionnan necesario pa crecemento, inversion y modernisacion di su infrastructura.

“Nos a traha duro pa pone e fundeshi di FreeZone Aruba na ordo. Awor nos ta den un fase unda nos por concentra riba su futuro y riba e oportunidadnan cu nos por crea pa diversifica and desaroya nos economia. E firma di e MOU aki ta un paso importante den e direccion ey. Nos no ta simplemente papia di un posibel cambio di localidad, sino di modernisa nos infrastructura, haci nos operacionnan mas eficiente y crea espacio pa mas negoshi por establece y crece na Aruba,” Minister Geoffrey Wever a expresa.

Cu e firma di e MOU, e ministerionan y organisacionnan involucra ta reafirma e importancia di cooperacion institucional pa logra desaroyo economico sostenibel. E acuerdo ta crea un base pa FZA y APA sigui profundisa nan cooperacion y explora e posibilidadnan concreto pa desaroyo di actividadnan di FreeZone na Barcadera. E siguiente pasonan lo concentra riba e evaluacion di e posibilidadnan di desaroyo, e condicionnan necesario y e coordinacion entre e instancianan involucra, cu e meta di logra un trayectoria structura y responsabel.