Ministerio di Naturalesa ta anuncia siguiente paso pa Ley na bienestar di animal

E ley nobo ta enfoca riba tres obhetivo principal:

• Proteccion di Animal Domestico: Garantisa siguridad y bienestar di nos mascota na Aruba;
• Castigo y sancion pa abusado: Establece medida stricto pa responsabilisa esnan cu ta comete crueldad of negligencia;
• Structura di posesion di animal: Crea un sistema formal pa por tin mascota pa garantisa cuido y responsabilidad.

E ley ta consisti di varios componente clave pa aborda bienestar di animal den un structura legal. 

1. Registracion obligatorio via iMcrochip: Tur mascota lo mester ta registra cu un microchip;
2. Sterilisacion obligatorio: Doñonan lo tin cu sterilisa nan mascota;
3. Reglamento pa criadonan (Breeders): Criadonan mester registra y cumpli cu standardnan stricto;
4. Responsabilidad di Cuido di Animal: Reglamento nobo lo stipula cuido adecua y duna  claridad pa loke ta trata responsabilidad como doño di mascota.

Aplicacion di e ley lo tuma luga den dos nivel:

• Handhaving (Cumplimento) Administrativo: Ministerio di Naturalesa lo ta encarga cu e sistema di registracion y monitor di cumplimento cu e ley, pa garantisa bienestar di animal. Lo ekipa inspectornan den e ministerio pa enforsa e ley, tareanan cu anteriormente tabata bou di Cuerpo Policial di Aruba (KPA).
• Handhaving (Cumplimento) Penal: Den caso severo di abuso, crueldad y negligencia grave di animal, e proceso hudicial lo keda bou mando di KPA y Ministerio Publico. Lo aplica e  Strafrechtelijk Handhaving. Ministerio ta traha di cerca cu autoridad competente pa garantisa cu esnan cu comete infraccion lo duna cuenta na husticia rapidamente.

Minister Arends tambe a informa cu e ley pa bienestar di animal ta drenta fase di consulta publico. Tur stakeholder, incluyendo veterinario, KPA, DLVV, fundacion- y miembronan di comunidad ta invita pa duna nan opinion y sugerencia. Esaki lo garantisa cu e ley ta refleha e necesidad di tur esnan envolvi den proteccion di animalnan na Aruba.

Adicionalmente, dos consulta publico lo tuma lugar na MFA Savaneta y MFA Paradera, unda   comunidad por yega  pa ricibi informacion y duna nan contribucion.

• MFA Savaneta: 4 di September 2024, 6:00 PM – 7:00 PM
• MFA Paradera: 6 di September 2024, 6:00 PM – 7:00 PM

E ley nobo ta bay man den man cu un campaña di conscientisacion cu ta enfoca riba educa comunidad riba importancia di ta un doño responsabel y tene empatia pa nos animalnan. E meta di campaña aki ta pa promove un cultura di cariño y responsabilidad pa nos mascota. Ministerio di Naturalesa a colabora cu artista local Ty Figaroa pa asina yuda comparti e mensahe pa stima nos mascotanan y ta un doño responsabel.

Un mascota ta parti di famia, y cuido y amor ta haci tur e diferencia den su bida. Stima bo mascota!