Ministerio di Enseñansa y psicologonan local ta firma acuerdo di estudio pa formacion como ‘GZ-psycholoog’
ORANJESTAD - Ministerio di Relacionnan den Reino, Enseñansa, Hubentud, Innovacion y Deporte a formalisa un paso importante den fortalecemento di cuido specialisa pa nos muchanan na Aruba.
A firma e acuerdonan di estudio entre Ministerio di Enseñansa y diferente psicologo local cu a inicia nan formacion Post-Master pa bira GZ-psycholoog.
E formacion aki ta tuma luga den cuadro di un acuerdo di colaboracion entre MDC y un ‘opleidingspraktijkinstelling’ reconoci y Psymia. Cu e cooperacion aki e compromiso pa inverti den profesionalnan local ta bira un realidad.
Ta trata aki di e formacion di nos profesionalnan pa diagnostica y trata problemanan compleho den area di cuido social-emocional pa nos muchanan, sin necesidad di ‘doorverwijzing’.
Esaki ta un paso importante pa ofrece un nivel di cuido mas specialisa, sostenibel y directamente disponibel pa nos muchanan.
Segun e acuerdo di gobernacion actual, e bienestar y cuido socio-emocional di nos muchanan ta un di e prioridadnan clave. Ministerio di Enseñansa ta mira e desaroyo aki como un punto di salida concreto di e compromiso pa continua na garantisa un sistema di cuido cu ta duradero y basa riba impactonan sistemico pa futuro.
Ministerio di Enseñansa ta compromete pa sigui traha den colaboracion estrecho cu nos profesionalnan local, pa asina comunidad por sigui confia riba un red di cuido specialisa cu ta adapta na necesidadnan di nos yiunan, famia y comunidad henter.