Minister di Turismo y IMF a reuni riba perspectiva economico, crecemento di turismo y e retonan den mercado laboral
ORANJESTAD - Riba 30 di september Minister di Turismo, Transporte y Labor, Wendrick Cicilia a reuni cu un delegacion di International Monetary Fund (IMF) como parti di e mision di consulta di articulo IV cu ta tuma luga cada dos aña.
E mision aki, realisa cada dos aña, ta brinda un oportunidad pa revisa e rindimento economico di Aruba, intercambia perspectivanan riba e retonan y oportunidadnan y fortifica coordinacion di politica cu partnernan internacional.
E discusionnan cu IMF a enfoca riba e perspectiva economico di Aruba, e rol central di turismo, y temanan urgente manera scarsedad di labor cu ta afecta un cantidad di sector. E delegacion tambe a revisa e acercamento mas amplio di gobierno pa maneho y gobernacion di sector publico, enfatisando e importancia di resiliencia a largo plaso, practicanan fiscal sano y crecemento sostenibel.
Rindimento di turismo
E cifranan recien (di luna di augustus) ta enfatisa e forsa continuo di e sector di turismo di Aruba:
- Yegada di estadia (jan–aug): 1.036.988, un aumento di 5% compara cu 2024;
- Turista crucero:605.183, un bahada di 2.6% compara cu aña 2024;
- E bishitantenan a pasa anochi riba e isla: 6.9 miyon, un crecemento di 2.4%;
- Promedio di gasto a yega Afl. 5.258,50, un aumento di 12,3% compara cu 2024.
E resultadonan aki ta resalta e posicion fuerte di Aruba como un destinacion lider, mientras tambe ta reenforsa e necesidad pa maneha crecemento na un manera responsabel y atende e retonan structural manera disponibilidad di forsa laboral.
Minister Wendrick Cicilia ta aprecia e dialogo constructivo cu IMF y a reafirma su compromiso pa avansa manehonan cu ta fomenta stabilidad economico, fortalece capacidad institucional, y sigura cu e beneficionan di turismo y desaroyo ta ampliamente comparti entre e pueblo Rubiano.