Minister di Husticia a reuni cu UNOPS pa posibel prison nobo pa Aruba
ORANJESTAD - Durante su bishita na Sint Maarten, ademas di atende e reunionnan di JVO, Minister Dowers a reuni cu ehecutivonan di United Nations Office of Project Services (UNOPS).
UNOPS ta presente na Sint Maarten principalmente pa sostene recuperacion y reconstruccion despues di horcan Irma, cu tabata devastador pa e isla na 2017. Ademas UNOPS ta brindando sosten na e expansion di Pointe Blanche Prison na Sint Maarten. Nan tin amplio experticio den supervision tanto tecnico, financiero, como di ehecucion di proyectonan publico.
UNOPS ta yuda maneha proyectonan grandi di reconstrucción financia pa partnernan internacional, sigurando compra transparente, maneho coherente di proyecto y cumplimento cu norma internacional. Nan trabou ta enfoca riba reconstruccion y mehoracion di scolnan, facilidadnan medico y infrastructura publico.
E reunion aki a tuma luga den cuadro di trabounan di preparacion andando pa Aruba haya un prizon nobo bao supervision di UNOPS. Denter di dos (2) siman, UNOPS lo ta na Aruba pa duna un presentacion di e plannan pa desaroyo di un prizon completamente nobo na Aruba, mirando e situacion di deterioro alarmante di e facilidad coreccional KIA na Santo di Patia.
Durante e bishita, Minister Dowers a reuni cu Deputy Regional Director Guiseppe Mancinelli, Head of Programme William Gonzalez y Regional Director for Latin-American and the Caribbean, Dalila Goncalves, pa discuti e oportunidadnan di cooperacion y sostenibilidad den e futuro proyectonan di reconstruccion.