Mei ta e luna Pa Crea Consciencia Tocante Cuido di Cuero
ORANJESTAD – In conexion cu e Luna di Conscientisacion pa cuido di cuero, Departamento di Salud Publico ta pidi comunidad pa para keto un rato y refleha riba e importancia di bo cuero.
Cuero no ta solamente bo prome liña di defensa contra mundo externo, pero e ta refleha tambe bo salud y bienestar general. Bo cuero merece bo atencion y cuido.
Ta mas facil cu bo ta pensa pa mantene un cuero saludabel y ilumina. Aki algun tips esencial:
- Come saludabel: Loke bo ta come tin un impacto directo riba e aparencia di bo cuero. Un dieta rico na fruta, berdura y antioxidantenan ta yuda nutri bo cuero di paden pa afo, lag'e luci mas hidrata y hubenil.
- Uza sunblock tur dia: E solo di Aruba ta fuerte! Proteha bo cuero tur dia contra e rayonan dañino di solo ta crucial pa preveni kemadura, mancha y malesanan manera cancer di cuero. No ta importa si e dia ta mustra scur, semper aplica un bon sunblock cu un factor di proteccion solar (SPF) adecua.
- No huma: Humamento tin un efecto perhudicial riba bo cuero. E ta causa un look cansa den bo cuero, envehecimento prematuro, liñanan di expresion marca y un color di cuero sin bida. Pa bo salud general y bunitesa di cuero, stop di huma!
- Sea atento na cualkier cambio: Bo cuero ta comunica cu bo. Ta importante pa bo ta consciente di cualkier cambio den bo cuero, manera aparicion di pipita, cambio di tamaño of color di un pipita existente of heridanan cu no ta sana. Si bo nota algo inusual, busca conseho medico profesional mesora.
- Corda, cuido di cuero ta un inversion den bo salud y bienestar na largo plaso. Haciendo esaki un prioridad, bo ta sigura un cuero mas fuerte, mas saludabel y mas feliz pa hopi aña.
Celebra e luna aki cu ta motiva bo pa cuida bo cuero, tumando accion awe mes!
