Mas cu 100 palet di ayudo humnitario lo sali rumbo pa Venezuela

Riba 29 di juni 2026, Prome Minister Mike Eman a bishita e iniciativa pa mira di cerca e gran cantidad di boluntario cu ta trahando pa sortea, paketa y prepara e donacionnan cu lo transporta pa e area afecta pa e temblor fuerte di diaranson ultimo na Venezuela. 

Durante e bishita, e Prome Minister a haci un recorido den e diferente area di e centro di colecta, unda e boluntarionan tabata sortea alimento, awa, producto di higiene, remedi y otro articulo di prome necesidad.

Segun Orlando Garcia, comerciante Venezolano y doño di Caribbean Printing, e iniciativa a cuminsa apenas algun ora despues di e tragedia.“Apenas 12 ora despues di e tragedia nos a reuni y haci un yamada na nos clientenan, amigo y proveedor pa cuminsa un accion humanitario. Awe nos ta yega cerca di 100 palet y esaki ta danki na e respuesta di henter pueblo di Aruba.” Garcia a destaca cu e accion ta un esfuerso conhunto di comerciante Venezolano estableci na Aruba, cu a logra moblisa nos comunidad di diferente nacionalidad.  

Durante e bishita, Prome Minister Mike Eman a destaca cu, segun e informacion cu Gobierno di Aruba ta ricibi directamente for di e ekipo medico Arubiano cu ta na Venezuela, remedi ta un di e necesidadnan mas urgente. “Nos ta aprecia tur loke comunidad ta reuni, pero remedi ta hopi importante. Nos ekipo medico a informa cu e stock di remedi a baha hopi lihe. Cuminda, awa y producto di higiene tambe ta sigui indispensabel” E Prome Minister a expresa tambe su speransa cu tur instancia competente lo sigui facilita e transporte di e ayudo pa logra cu e mercancia yega mas lihe na e famianan cu mester dje. Mas cu e cantidad di donacionnan, Prome Minister Eman a destaca e espirito di solidaridad cu Aruba ta demostrando. “Mi ta sinti un emocion special ora mi ta mira con nos pueblo ta responde. Hende di diferente nacionalidad ta uni cu amor y solidaridad pa yuda otro ser humano. Esaki ta algo hopi bunita y algo cu nos por ta orguyoso di dje.” 

Actualmente, e centro di colecta den e parkeerplaats di Paseo Herencia ta sigui ricibi donacion mientras e boluntarionan ta prepara e siguiente cargamento rumbo pa Venezuela. Gobierno di Aruba ta continua coordina cu diferente partner local y internacional como tambe sigui monitor e situacion di cerca pa identifica con por sigui apoya e esfuerso humanitario pa yuda Venezuela.